Varðskipið Þór á leið til Grímseyjar vegna skjálftahrinu

Uppfært kl.08.54

Frá miðnætti hafa yfir 200 jarðskjálftar mælst í hrinunni við Grímsey. Hrina hófst þann 8. september austur af Grímsey og hafa yfir 5000 jarðskjálftar mælst. Stærsti skjálftinn mældist kl 04:01 þann 8. september og reyndist hann 4.9 að stærð. Stærstu skjálftar hrinunnar hafa fundist víða á norðurlandi. Skrifað af vakthafandi jarðvísindamanni 11. sep. 07:06

Í gær var sett á óvissustig Almannavarna vegna jarðskjálftahrinu úti fyrir Norðurlandi. Í dag var haldinn stöðufundur með viðbragðsaðilum sem málið varðar og farið yfir stöðuna. Engar sérstakar breytingar hafa orðið en talsverð skjálftavirkni er enn á svæðinu, þ.e. austur og austsuðaustur af Grímsey. Á þessum sólarhring hafa t.a.m. orðið 24 skjálftar stærri en 3 og hafa þeir fundist allt inn til Akureyrar. Upplýsingar um þetta eru mjög aðgengilegar inni á vef Veðurstofunnar.

Lögreglan á Norðurlandi eystra hefur verið í sambandið við íbúa í Grímsey vegna stöðunnar og hefur komið fram að þeir finna vel fyrir skjálftunum en eru almennt rólegir yfir stöðu mála þó svo að það sé ávallt óþægileg tilfinning að vera í slíkri nánd við upptökin og að vera svona afskekkt ef að eitthvað skyldi koma uppá.

Í þessu samhengi þá mun varðskipið Þór koma á svæðið nú næstu nótt og vera til aðstoðar ef á þarf að halda. Áfram verður fylgst vel með þróuninni og hefur verið boðað til næsta stöðufundar á mánudaginn eða fyrr ef á þarf að halda.

Hér má sjá yfirlitsmynd af vef Veðurstofunnar

Hrina hófst þann 8. september austur af Grímsey og hafa yfir 4300 jarðskjálftar mælst. Stærsti skjálftinn mældist kl 04:01 þann 8. september og reyndist hann 4.9 að stærð. Í dag, 10. september mældist skjálfti 3.9 að stærð kl 14:44. Stærstu skjálftar hrinunnar hafa fundist víða á norðurlandi.
Skrifað af vakthafandi jarðvísindamanni 10. sep. 14:56