Lögreglan hættir á Facebook

Lögreglan á Suðurnesjum hættir á Facebook

Öflug persónuvernd er lögreglunni á Suðurnesjum kappsmál og leggjum við áherslu á að öll meðferð persónuupplýsinga sé í samræmi við kröfur persónuverndarlaga. Lögum samkvæmt ber okkur að tryggja að vinnsla persónuupplýsinga sé með þeim hætti að viðeigandi öryggi upplýsinganna sé tryggt. 

Persónuvernd hefur gert athugasemdir við notkun lögreglu hér á landi á samfélagsmiðlinum Facebook og þá sérstaklega í tengslum við móttöku upplýsinga í gegnum miðilinn. Vegna þessa hefur LSS tekið þá ákvörðun að hætta að nota Facebook í  samskiptum sínum við almenning og loka síðunni.  Síðunni verður lokað eftir sólarhring.

Upplýsingar og tilkynningar til almennings munu áfram verða birtar á heimasíðu lögreglunnar, logreglan.is og í fjölmiðlum eftir því sem við á og við bendum fólki jafnframt á netfang okkar sudurnes@logreglan.is og 112.is þar sem brugðist er við erindum um leið og þau berast.“

Lögreglan á Höfuðborgarsvæðinu hættir ekki á Facebook

Lögreglan á höfuðborgarsvæðinu vill koma á framfæri að tilgangurinn með notkun lögreglu á Facebook sem samskiptamiðli er fyrst og fremst að koma mikilvægum skilaboðum til almennings, auðvelda samskipti, bæta og auka þjónustu við notendur og einnig að svara kalli nútímans um breyttar og fjölbreyttari samskiptaleiðir með því að fjölga þeim leiðum sem eru í boði. Þess má geta að Lögreglan á höfuðborgarsvæðinu hefur verið á Facebook frá árslokum 2010 og eru fylgjendur hennar á þessum vettvangi nú um 95 þúsund.

Í mars 2021 skilaði Persónuvernd af sér ákvörðun í kjölfar frumkvæðisathugunar á hvort notkun embættisins á samfélagsmiðlinum Facebook væri í samræmi við persónuverndarlög. Í ákvörðun Persónuverndar var sett út á atvik þar sem LRH óskaði eftir upplýsingum frá almenningi í gegnum einkaskilaboð á Facebook-síðu hennar. Í kjölfar ákvörðunarinnar var farið yfir verklag og tekið fyrir að beðið yrði um upplýsingar frá almenningi gegnum miðilinn, en þess í stað aðrar leiðir nýttar til móttöku upplýsinga.

Tekið skal fram að embættið veitir ekki persónugreinanlegar upplýsingar til aðila í gegnum samskiptamiðilinn heldur leiðbeinir fólki um að beina erindum í réttan farveg sé þess þörf. Því telur embættið að ekki sé tilefni til þess að hætta notkun þess á samfélagsmiðlinum í ljósi þess að um er að ræða mikilvægan vettvang fyrir lögreglu til að ná til almennings og auka sýnileika lögreglu í samfélaginu.

Embættið vill taka fram að persónuverndarmálefni eru í sífelldri endurskoðun hjá embættinu með það að leiðarljósi að öll meðferð þess á persónuupplýsingum sé í samræmi við ákvæði persónuverndarlaga enda mikilvægt að öryggi persónuverndarupplýsinga sé tryggt í starfsemi lögreglu.