Í þetta skiptið á að taka veiðina alvarlega, slaka á í ruglinu og njóta náttúrunnar
Síðasta veiðiferðin eftir Þorkel Harðarson og Örn Marinó Arnarson er nú sýnd í Laugarásbíói, Senubíóunum og Sambíóunum Keflavík.
Það var sammála niðurstaða ritstjórnar Fréttatímans að um er að ræða eina bestu mynd sem framleidd hefur verið á Íslandi. Hægt er að fullyrða að allir sem þekkja til stangaveiði, kannist við þá persónuleika sem þarna er lýst á snilldarlegan hátt og greinilegt að sá sem skrifaði handritið hefur fengið helling af ,,inside information“ úr skrautlegum veiðiferðum en myndin er byggð á sannsögulegum atburðum.
Í þetta skiptið á að taka veiðina alvarlega, slaka á í ruglinu og njóta náttúrunnar. Það er erfitt að kenna gömlum hundum að sitja og brátt þróast mál þannig að allt fer á versta veg – hratt og örugglega. Veiðifélagarnir eru hver af sínu sauðahúsinu og karakterarnir eru frábærlega vel leiknir af þeim Hjálmari Hjálmarssyni, Hilmi Snæ Guðnasyni, Halldóri Gylfasyni, Þorsteini Bachmann, Þresti Leó Gunnarssyni og Jóhanni Sigurðarsyni sem fara með aðalhlutverkin í þessari gamanmynd um vinahóp sem fer í sinn árlega veiðitúr.
Tveir eru um hverja stöng og myndin sýnir hvernig veiðifélagarnir höndla veiðimennskuna og m.a. hittir Bubbi Morthens þá félaga, er hann er við veiðar við Laxá í Aðaldal, en þeir eru einlægir aðdáendur hans. Það var mikið hlegið í bíósalnum af mörgum kómískum uppákomum í þessari sprenghlægilegu og raunsönnu mynd um veiðifélaga í laxveiði og það verður enginn svikinn af því að mæta á gamanmyndina Síðasta veiðiferðin sem er meistaralega vel skrifuð og leikin og fær fullt hús stiga fyrir það,