,,Góðan daginn gott fólk. Þetta er staðan núna í morgunsárið á Ísafirði og öruggt er að svo er einnig víðar á Vestfjörðum. Við hvetjum alla til að fara varlega og aka í samræmi við aðstæður. Þó svo að í áramótakveðju okkar hafi verið komið inn á fallega morgna í maí þá er maí ekki hálfnaður og hægt að búast við ýmsu eins og við flest þekkjum. Þetta kemur allt.“ Segir í tilkynningu lögreglunnar á Ísafirði og þar er greinilega meiri þörf fyrir nagladekkin en í 101 Reykjavík í dag.
Hugleiðingar veðurfræðings – Veðurspá Veðurstofu Íslands
Það verður áfram norðlæg átt á landinu, 5-13 m/s og snjókoma eða slydda fyrir norðan. Stöku skúrir sunnantil og rigning eða jafnvel slydda seint í kvöld. Hitastig verður um eða yfir frostmarki norðanlands en allt að 9 stigum yfir daginn syðst. Svipað veður verður á morgun, norðan og norðaustan 3-10 en 10-15 um landið norðvestanvert. Snjókoma eða slydda norðantil en léttir til sunnan heiða. Hiti 0 til 8 stig. Það dregur úr vindi og smám saman úr ofankomu á föstudag, snýst svo í austanátt með vætu á laugardag og byrjar hægt að hlýna.
Veðuryfirlit
600 km A af Langanesi er 984 mb lægð sem fer hægt NA. 200 km SA af Færeyjum er 989 mb lægð á austurleið en skammt S af Dyrhólaey er 995 mb hægfara smálægð. Yfir N-Grænlandi er 1017 mb hæð, en 300 km NA af Hvarfi er vaxandi 1002 mb lægð sem fer A.
Veðurhorfur á landinu
Norðan og norðaustan 5-13 m/s og slydda eða snjókoma á norðurhelmingi landins. Skýjað með köflum sunnantil og stöku skúrir, en allvíða rigning eða slydda þar í kvöld. Norðaustan 5-10 á morgun en 8-15 norðvestantil. Víða rigning eða snjókoma en léttir til sunnan heiða seinnipartinn.
Hiti 0 til 8 stig að deginum, hlýjast sunnanlands.
Veðurhorfur á höfuðborgarsvæðinu
Norðvestan 3-8, skýjað með köflum og yfirleitt þurrt, en rigning eða slydda seint í kvöld. Norðan 8-13 á morgun og léttir til eftir hádegi. Hiti 3 til 6 stig yfir daginn.
Veðurhorfur á landinu næstu daga
Á föstudag:
Norðan 5-10, en hvassari með austurströndinni. Snjókoma eða slydda á Norður- og Austurlandi og hiti um frostmark. Bjartviðri sunnan heiða með hita að 9 stigum yfir daginn.
Á laugardag:
Austan 5-13 og rigning með köflum en heldur hægari og úrkomuminna fyrir norðan. Úrkomuminna um kvöldið. Hlýnar smám saman.
Á sunnudag:
Suðlæg átt 3-8, skýjað og væta af og til en úrkomulítið fyrir norðan. Hiti 6 til 12 stig en svalara fyrir austan.
Á mánudag og þriðjudag:
Austlæg átt, skýjað með köflum og víða þurrt. Milt í veðri, einkum vestantil á landinu.