45. þing ASÍ var sett í dag, klukkan 10:00. Kristján Þórður Snæbjarnarson, forseti ASÍ setti þingið í kjölfar tónlistarflutnings hljómsveitarinnar GÓSS. Kristján Þóður vék að þeim áskorunum sem verkalýðshreyfingin stendur frammi fyrir, bæði heima fyrir og í alþjóðlegu samhengi.
Guðmundur Ingi Guðbrandsson, félags- og vinnumarkaðsráðherra ávarpaði því næst fulltrúa á þinginu og sagði frá þeim málefnum sem hann vildi leggja sérstaka áherslu á í embætti, m.a. málefni öryrkja og jafnréttismál, en hann talaði einnig fyrir góðri samvinnu við verkalýðshreyfinguna.
Því næst talaði Ólafur Margeirsson, hagfræðingur frá Sviss og fjallaði um íbúðahúsnæði sem fjárfestingakost fyrir lífeyrissjóði. Þingið stendur fram á miðvikudag en kosningar um forseta ASÍ fara fram eftir hádegi á miðvikudeginum.
Þau sögulegu tíðindi voru að berast að Ragnar Þór Ingólfsson, formaður VR, dró í dag framboð sitt til forseta ASÍ til baka. Sólveig Anna Jónsdóttir, formaður Eflingar, og Vilhjálmur Birgisson, formaður Starfsgreinasambandsins, hafa líka hætt við að gefa kost á sér í embætti varaforseta. Þetta er sérstök uppákoma að forystufólk stærstu aðildarfélaga og landssambanda innan Alþýðusambands Íslands hætti við framboð og gangi út af þinginu ásamt stuðningsfólki sínu.
Ragnar Þór Ingólfsson, formaður VR, neitaði að tjá sig við fjölmiðla. Vilhjálmur Birgisson, formaður Starfsgreinasambandsins, og Sólveig Anna Jónsdóttir, formaður Eflingar, sögðu bæði að skoða þyrfti hvort hreyfingar þeirra yrðu áfram innan raða ASÍ. Bæði Sólveig Anna og Ragnar Þór hafa áður talað um möguleika þess að félög þeirra segi sig úr ASÍ. Þetta eru tvo stærstu félögin.
