Mennta- og barnamálaráðuneytið kynnir nú til umsagnar drög að reglugerð um fyrirkomulag og framkvæmd samræmds námsmats í grunnskólum. Reglugerðin snýr annars vegar að nýju samræmdu prófunum í íslensku og stærðfræði sem allir nemendur í 4., 6. og 9. bekk grunnskóla gangast undir í fyrsta sinn nú í vor og hins vegar að safni valkvæðra matstækja Matsferils. Samræmda námsmatið, Matsferill, er miðlægt heildstætt safn matstækja í formi staðlaðra stöðu- og framvinduprófa, skimunarprófa og annarra matstækja sem kennarar og skólar geta nýtt sér í kennslu og við mat á stöðu og framvindu hvers barns í námi, jafnt og þétt yfir skólagönguna.
Samkvæmt reglugerðinni sem nú hefur verið kynnt í Samráðsgátt er stefnt að birtingu bæði árangurs nemenda á landsvísu sem og niðurstaðna einstakra grunnskóla.
Markmið Matsferils er að
- veita upplýsingar um stöðu og framfarir nemenda,
- meta árangur miðað við ákveðin hæfniviðmið aðalnámskrár,
- styðja við skipulag kennslu og snemmtækan stuðning,
- veita nemendum, foreldrum, skólum og menntayfirvöldum upplýsingar um námsárangur og námsframvindu nemenda,
- veita samanburðarhæfar upplýsingar um stöðu grunnskóla, sveitarfélaga og skólakerfis í heild til stefnumótunar í námi og kennslu.
Miðstöð menntunar og skólaþjónustu annast framkvæmd Matsferils, vinnslu og varðveislu upplýsinga í samræmi við lög um persónuvernd og vinnslu persónuupplýsinga. Matið er lagt fyrir með rafrænum hætti. Niðurstöður samræmda námsmatsins skulu nýttar við skipulag náms og kennslu nemenda. Grunnskólar skulu fylgja eftir niðurstöðunum þannig að slíkt mat leiði til umbóta í skólastarfi og ber að gera skólanefndum sveitarfélaga árlega grein fyrir niðurstöðum og umbótum. Miðstöð menntunar og skólaþjónustu skal jafnframt nýta niðurstöður til að styðja við skólastarf.
Niðurstöður skyldubundinna prófa verða gerðar aðgengilegar og birtar opinberlega, t.d. staða hvers skóla miðað við landsmeðaltal í skólum yfir ákveðnum nemendafjölda.
Í lögum samþykktum á Alþingi 16. júní 2025 var ráðherra heimilað að setja í reglugerð nánari ákvæði um fyrirkomulag og framkvæmd samræmds námsmats. Drög að slíkri reglugerð eru hér kynnt til umsagnar í Samráðsgátt stjórnvalda:
Mennta- og barnamálaráðuneytið hvetur foreldra, kennara, skólastjórnendur, nemendur, aðra hagaðila og alla þá sem láta menntun barna sig varða til að veita endurgjöf.
