,,Hvernig í ósköpunum dettur ríkisstjórninni í hug að ætla að auka útgjöld vegna utanríkismála um marga milljarða á næstu árum?!“
Óli Björn Kárason, alþingismaður, birtir afar skýra og aðgengilega grein í Morgunblaðinu um útgjaldaþróun ríkisins næstu fimm ár eins og hún birtist í fjármálaáætlun ríkisstjórnarinnar.
Í töflum, sem birtast með grein þingmannsins vekur einn þáttur sérstaka athygli.
Í fjórða sæti yfir þá kostnaðarliði, sem hækka hlutfallslega mest á tímabilinu 2017-2023 eru utanríkismál en gert er ráð fyrir að framlög til þeirra aukizt um 32%.
Þau eiga að hækka meira hlutfallslega en framlög til örorku og fatlaðra. Og meira en framlög til sjúkrahúsaþjónustu og aldraðra.
Hvað veldur og hverjum dettur þetta í hug?
Ísland er örríki og hefur nánast engin áhrif á alþjóðavettvangi.
Utanríkisþjónustur eins og þær eru reknar í dag eru 19. aldar fyrirbrigði.
Við getum auðveldlega komist af með mun færri sendiráð en nú eru rekin í öðrum löndum. Mörg þeirra hafa litlum sem engum verkefnum að sinna.
Hvernig í ósköpunum dettur ríkisstjórninni í hug að ætla að auka útgjöld vegna utanríkismála um marga milljarða á næstu árum?!
Lærðu stjórnmálamenn og embættismenn ekkert af því að sóa á annað þúsund milljónum króna af almannafé í vonlausa tilraun til að komast í Öryggisráð Sameinuðu þjóðanna en þangað áttum við ekkert erindi? Segir Styrmir Gunnarsson fyrrverandi rirstjóri Morgunblaðsins.