Þann 1. september 2023 voru samtals 658 börn 12 mánaða og eldri á biðlista eftir leikskólaplássi í borgarrekna leikskóla. Til viðbótar eru 67 börn að bíða eftir flutningi úr sjálfstætt starfandi leikskóla.
Áætlað er að um 180-200 börn 12 mánaða og eldri frá 1. september séu ekki með dagvistun, að stórum hluta til eldri börn sem eru nýkomin á biðlista eftir leikskóla í Reykjavík.
Aðlögun í bæði borgarrekna og sjálfstætt starfandi leikskóla er í fullum gangi. Börnin byrja í aðlögun eftir skipulagi, oft elstu börnin fyrst og svo eru börnin tekin inn eftir aldri og eftir því sem nýráðið starfsfólk hefur störf.
Mörg með vistun annarsstaðar en í borgarreknum leikskólum
Meðal þeirra barna sem eru á biðlistanum eru um 120 börn sem eiga eftir að fá úthlutað plássi hjá sjálfsstætt starfandi leikskóla í borginni. Börn sem eru að fara að hefja vistun í sjálfstætt starfandi leikskólum en eru á biðlista eftir borgarreknum leikskólum detta ekki út af biðlistanum fyrr en vistun hefst. Þá eru í dag 375 í vist hjá dagforeldrum, og flest þeirra eru á biðlista eftir leikskólaplássi.
Það er alltaf ákveðin keðjuverkun í vistunarmálum barna á leikskólaaldri en þegar pláss býðst í borgarreknum leikskóla losna gjarnan pláss á móti hjá sjálfsstætt starfandi skólum og hjá dagforeldrum sem bjóðast þá öðrum börnum. Þá er mikil hreyfing á listum þegar fjölskyldur flytja á milli bæjarfélaga. Þá munu bætast við pláss hjá borgarreknum jafnt sem sjálfstætt starfandi skólum þegar viðgerðum og endurbótum á húsnæði lýkur og þegar nýtt skólahúsnæði er opnað.
Vert er að hafa í huga að 2021 er sérlega stór árgangur (einungis árgangur 2009 er stærri) og 2017 árgangurinn sem var að hefja göngu sína í 1. bekk er minnsti árgangurinn í grunnskólum borgarinnar. Stærðarmunur árganganna sem voru að fara í skóla og þeirra sem eru að koma inn er tæplega 300 börn.
