Maðurinn sem féll í Núpá er enn ófundinn

Uppfært kl. 06.00:
Maðurinn sem féll í Núpá er enn ófundinn. Nú eru 43 leitarmenn á 17 tækjum að störfum á vettvangi. Þar af eru 4 kafarar og einn læknir. Þá er einnig einn leitarhundur á staðnum. Aðstæður á vettvangi eru erfiðar vegna myrkurs og veðurs en gengið hefur verið með ánni í leit að manninum auk þess sem kafarar eru að leit á völdum stöðum. Á vettvangi gengur á með éljum þannig að ekki hefur verið unnt að beita þyrlu LHG við leitina.
Óskað hefur verið eftir aukamannskap af öðrum svæðum til að aðstoða við leitina og er önnur þyrla LHG á leiðinni norður með 10 manna hóp, sem er sérhæfður í straumvatnsbjörgun. Reiknað er með þyrlunni á Akureyri kl. 04:00. Aðgerðarstjórn almannavarna á Akureyri var mönnuð vegna verkefna sem tengjast óveðrinu og er aðgerðum vegna þessa máls stjórnað þaðan.
Tilkynnt um slysið í gær
Laust fyrir kl 22:00 barst Lögreglunni á Norðurlandi eystra tilkynning um að maður hefði fallið í Núpá sem er í Sölvadal inn af Eyjafirði. Þarna voru tveir menn að vinna við stíflu sem er í ánni þegar krapagusa hreif annan manninn með sér.

Þegar var allt tiltækt lið björgunarsveita sent á vettvang ásamt lögreglumönnum og lækni. Erfiðlega gékk að komast á vettvang vegna ófærðar og þurfti að fá snjóruðningstæki til að fara á undan. Einnig var kölluð til þyla frá Landhelgisgæslunni og með henni koma fjórir kafarar.

Erfiðlega gekk að ná aftur sambandi við tilkynnanda á vettvangi vegna aðstæðna. Björgunarsveitarmenn á vélsleðum voru fyrstir á staðinn og hófu upplýsingaöflun og leit.
Þyrla LHG ert rétt um það bil að lenda við vettvang og björgunarsveitarmenn eru að leita með ánni. Þá er verið að ræða við aðstandendur mannsins sem er týndur. Á þessari stundu er ekki unnt að veita frekari upplýsingar