Endurskoða tekjuskatts- og bótakerfi einstaklinga og fjölskyldna
Þessir hópar, þ.e. stefnumótandi stýrinefnd og sérfræðingahópur, eru stofnaðir í tengslum við yfirlýsingu ríkisstjórnarnar frá 27. febrúar 2018 um aðgerðir í þágu félagslegs stöðugleika í tengslum við gerð kjarasamninga á almennum markaði.
Þar kemur fram að endurskoða eigi tekjuskattskerfið með áherslu á lækkun skattbyrði og mögulegar breytingar gerðar á fyrirkomulagi persónuafsláttar og samspili við bótakerfi sem ætlað er að styðja við tekjulægri hópa. Meðal þess sem skoðað verður að sett verði á fót heildstætt kerfi sem taki jafnt til stuðnings hins opinbera við barnafjölskyldur og stuðnings vegna húsnæðiskostnaðar, hvort heldur er fyrir íbúðareigendur eða leigjendur.
Í stýrinefndinni sitja eftirtaldir aðstoðarmenn þriggja ráðherra:
- Páll Ásgeir Guðmundsson, aðstoðarmaður fjármála- og efnahagsráðherra, sem verður formaður,
- Bergþóra Benediktsdóttir, aðstoðarmaður forsætisráðherra og
- Arnar Þór Sævarsson, aðstoðarmaður félags- og jafnréttismálaráðherra.
Meginhlutverk stýrinefndarinnar er að fylgjast með framvindu verkefnisins í sérfræðingahópnum og taka þátt í mótun og samþykkt einstakra tillagna sem verða til á vettvangi sérfræðingahópsins. Stýrinefndin hefur reglulegt samráð við samtök launþega og aðra þá aðila sem hagsmuna eiga að gæta við tillögugerðina.
Í sérfræðingahópnum sitja eftirtaldir sérfræðingar:
- Axel Hall, hagfræðingur og lektor í HR, sem verður formaður hópsins,
- Benedikt Árnason, skrifstofustjóri í forsætisráðuneytinu,
- Elín Alma Arthúrsdóttir, sviðsstjóri hjá RSK,
- Maríanna Jónasdóttir, skrifstofustjóri í fjármála- og efnahagsráðuneytinu og
- Ólafur Darri Andrason, skrifstofustjóri í velferðarráðuneytinu
Sérfræðingahópurinn hefur það hlutverk að annast greiningu verkefnisins, talnalega meðferð og útfærslu tillagna, m.a. á grundvelli fyrri skýrslna af sama meiði. Jafnframt skal horft til kerfa annarra landa, einkum Norðurlandanna.
Fyrstu tillögur hópanna munu liggja fyrir á haustmánuðum 2018.
Discussion about this post