Fjármálaeftirlitið hóf í gær athugun á hlutafjárútboði sem auglýst er á vefsíðunni hluthafi.com. Á síðunni kemur fram að óskað sé eftir hlutafjárloforði a.m.k. tíu til tuttugu þúsund hluthafa í þeim tilgangi að endurreisa flugfélagið WOW eða stofna nýtt lággjaldaflugfélag.
Fjármálaeftirlitið taldi að framangreind áskriftarsöfnun félli undir hugtakið almennt útboð verðbréfa, sbr. 43. gr. laga um verðbréfaviðskipti nr. 108/2007, en með almennu útboði er átt við hvers konar boð til almennings um kaup á verðbréfum. Áður en farið er í almennt útboð verðbréfa þarf að gefa út lýsingu í samræmi við 1. mgr. 44. gr. laga um verðbréfaviðskipti.
Fyrr í dag sendi Fjármálaeftirlitið erindi til forsvarsmanna hluthafi.com þar sem gerð var krafa um að heimasíðunni yrði lokað þar sem ekki virtust uppfyllt skilyrði laga um verðbréfaviðskipti, m.a. varðandi útgáfu lýsingar. Í kjölfar þessa hafa forsvarsmenn hluthafi.com breytt fyrirkomulagi áskriftarsöfnunarinnar á þann hátt að nú er miðað við skráningu fyrir hlutaskírteini í einkahlutafélagi sem fellur ekki undir lög um verðbréfaviðskipti.
Fjármálaeftirlitið vekur athygli á að almennir fjárfestar njóta ekki sömu verndar vegna kaupa í einkahlutafélagi og þegar þeir taka þátt í almennu hlutafjárútboði.
(PDF skjal) Yfirlysing-FME-vegna-hluthafi.com-15.4.2019
,,Af einhverjum ástæðum, þá hafa fjölmiðlar óskað eftir að upplýst verði hverjir standi á bak við Hluthafi.com.
Eins og fram hefur komið:
Hollvinir almennrar samkeppni.
Við erum einstaklingar, sem sjá að rekstur lággjaldaflugfélags í eigu íslendinga er raunhæfur kostur og viljum að landsmenn taki sig saman til að endurreisa Wow air eða stofna nýtt lággjaldafélag, sem er eitt brýnasta hagsmunamál þjóðarinnar í dag.
Þeir einstaklingar sem standa að gerð þessarar síðu og væntanlegs hlutafélags hafa ekki starfað hjá Wow air og eru ekki tengdir félaginu á nokkurn hátt.
Þessir aðilar eru kostaðir af Sólhús ehf. Kt. 411003-3450.
Umsjónamaður þessarar síðu er Friðrik Atli Guðmundsson.
Forsvarsmenn Hluthafi.com og Sólhúsa ehf. eru ekki og ætla ekki að vera opinberar persónur, viljum við að almenningur og fjölmiðlar virði okkar friðhelgi og þau réttindi sem því fylgir.
Við vonumst til að ráða talsmann en þangað til verða fréttir birtar reglulega á síðunni Hluthafi.com“
