TF-GRO, þyrla Landhelgisgæslunnar, var kölluð út að beiðni lögreglunnar á Vesturlandi vegna lítillar flugvélar sem hlekktist á í flugtaki í Svefneyjum síðdegis í dag. Tveir voru um borð. Þeir komust sjálfir út úr vélinni og sluppu óslasaðir.
TF-GRO flutti fulltrúa rannsóknarnefndar samgönguslysa á vettvang sem og lögreglumenn frá Stykkishólmi. Flugmaður og farþegi vélarinnar voru fluttir til Reykjavíkur með þyrlunni.
Þetta var annað útkall þyrlusveitarinnar í dag en laust fyrir klukkan tíu í morgun var óskað eftir þyrlu vegna veikinda á Hornströndum.
TF-GRO lenti ofan við neyðarskýlið í Hlöðuvík og flutti sjúklinginn til Reykjavíkur.
Umræða
