Sigurður Ingi Jóhannsson, innviðaráðherra, tók þátt í setningu eldvarnaátaks á vegum Landssambands slökkviliðs- og sjúkraflutningamanna í Sjálandsskóla í Garðabæ í morgun. Við þetta tækifæri fengu börn í 3. bekk skólans fræðslu um eldvarnir.
Eldvarnaátakið er árlegur viðburður og þá fara slökkviliðsmenn í heimsókn í alla 3. bekki í skólum landsins. Öll slökkvilið landsins þátt í átakinu. Teiknimyndin um Loga og Glóð er sýnd og börnin fá góða fræðslu um reykskynjara, flóttaleiðir, slökkvitæki, eldvarnateppi og neyðarnúmerið 112. Þau fá einnig litla bók um eldvarnir heimilisins sem þau fara með heim og sýna foreldrum.
Að lokinni fræðslustund um eldvarnir fór fram æfing. viðvörunarkerfi skólans var sett í gang og skólinn var rýmdur samkvæmt áætlun. Einnig fór fram sérstök björgunaræfing og sýnt hvernig einstaklingi úr reykfylltu rými á annarri hæð byggingar er bjargað. Loks fengu nemendur og starfsfólk skólans kennslu og þjálfun í notkun slökkvitækja og eldvarnateppa. Ráðherra var meðal þeirra sem spreytti sig á því.
