Lögreglu hafa borist nokkuð af tilkynningum um slík vörusvik á undanförunum árum en nú eru svindlararnir farnir að koma sér fyrir á viðurkenndum sölusíðum erlendis. Þeir falsa skráningar og setja upp heimasíður til að ljá svikum sínum trúverðugleika og bjóða vörur á þessum síðum. Þeir eru liprir í tölvupóstsamskiptum og eiga það til að fylgja eftir í símtölum.
Myndirnar sem fylgja hafa svindlararnir einfaldlega stolið af örðum síðum og eru þær að því leiti trúverðugar, nema að þeim var líka stolið.
Það er eftir miklu að slægjast fyrir glæpamennina og oftast er þetta armur af skipulögðum glæpum. Gefin eru öll góð fyrirheit en um leið og greiðsla hefur borist þeim þá hverfa þeir og peningarnir. Algengt tjón í svona málum er frá 2.5 milljónum og upp í 10 milljónir, þannig að svindlararnir geta náð til sín miklum fjármunum á þennan hátt. Enda erum við að sjá vönduðustu glæpina þar sem gróðinn er mestur.
Þar liggur einmitt vandinn, það er að glæpasamtök eru farin að leggja vandaða vinnu í þess konar svindl. Við biðjum því fólk að sýna hæfilega tortryggni, sem í dag er að ganga út frá því að það sem er á netinu sé svindl þar til að grandvar kaupandi viti annað.
Eitt sem má gera er að skoða heimasíður hjá https://whois.domaintools.com/
Þar er hægt að sjá ýmsar upplýsingar um skráningu síðunnar, ekki síst hvað síðan er gömul og hvort einhver sé skráður ábyrgur. Þetta er samt alls ekki 100% og það borgar sig líka að leita að umsögnum á netinu. Alls ekki láta þær fyrstu duga því svindlararnir sjálfir vita þetta og setja inn mjög jákvæðar umsagnir um sjálfa sig.
Þetta eru allt ágæt atriði til að hafa í huga. En ef þið eruð að eiga viðskipti við einhvern í fyrsta sinn eða að viðskiptaaðili vill fá peninga á nýjan reikning þá eru það hættumerki. Ef þið eruð í samstarfi við aðra, spyrjist þá líka fyrir um áreiðanleika. Gerið sem mest til að sannfæra ykkur um hvort að um er að ræða raunverulegt fyrirtæki eða svindl.
Það eru ansi margir þarna úti sem mun reyna að svindla á ykkur og því byrjar netöryggi hjá ykkur sjálfum. Í eðli sínu er samskonar svindl vel þekkt í gegn um aldirnar, en með tilkomu internetsins/veraldarvefsins þá er aðgengi svindlara að stórum hóps orðið miklu auðveldara og hægt að stunda þá nafnleysi með að koma algjörlega fram í fölsku nafni.
Við höfum fengið tilkynningar um samskonar svindl á örðum síðum eins og braskað og brall, þar eru minni upphæðir í húfi en oft eru fögur fyrirheit og tölvusvikapóstur í nafni þekktra aðila eins og Fed-ex eða paypal að ofgreitt hafi verið fyrir þjónustu og þegar brotaþoli sé búinn að borga mismuninn þá verði greiðsla lögð inn á þá. Í þeirri von að brotaþoli sendi peninga og þá láta glæpamennirnir ekki heyra frá sér aftur.
