Stuðningur við Úkraínu og efling sameiginlegra varna Atlantshafsbandalagsins var meginefni fundar varnarmálaráðherra bandalagsins sem fram fór í Brussel í dag. Þórdís Kolbrún Reykfjörð Gylfadóttir utanríkisráðherra sat fundinn fyrir hönd Íslands.
Oleksii Reznikov, varnarmálaráðherra Úkraínu, ávarpaði fundinn og greindi frá alvarlegri stöðu mála þar í landi og aðgerðum úkraínska hersins í kjölfar innrásar Rússlands 24. febrúar sl. Varnarmálaráðherrar Finnlands, Svíþjóðar og Georgíu sátu einnig fundinn, ásamt fulltrúa Evrópusambandsins.
„Bandalagsríkin eru sammála um að úkraínska þjóðin sýni einstakt baráttuþrek og hugrekki við hryllilegar aðstæður. Við styðjum öll við Úkraínu og það er einhugur um að efla þann stuðning enn frekar,“ segir utanríkisráðherra. „Ég lýsti á fundinum stuðningi íslensku þjóðarinnar og vilja Íslands til að styðja enn frekar við Úkraínu og úkraínsku þjóðina. Þá ljáði ég máls á mikilvægi þess hugað sé að vörnum gegn kynbundnu ofbeldi sem er ein af mörgum hryllilegum birtingarmyndum stríðsátaka og neyðarástands.“
Atlantshafsbandalagið hefur aukið viðbúnað sinn vegna innrásar Rússlands í Úkraínu, einkum í bandalagsríkjunum í austri. Á fundinum í dag var ákveðið að móta tillögur um eflingu sameiginlegra varna bandalagsins til framtíðar og verða þær lagðar fyrir fundi varnarmálaráðherra bandalagsins í júní.
„Hin ólöglega og óforsvaranlega innrás Rússlands í Úkraínu hefur gjörbreytt mati bandalagsþjóða á umhverfi öryggis- og varnarmála. Um þessar mundir fer alls staðar í álfunni fram endurmat á varnarviðbragði í ljósi þessara grafalvarlegu stöðu. Þetta er dapurleg þróun sem við verðum þó að horfast í augu við af yfirvegun og raunsæi. Viðbúnaður og varnargeta bandalagsins munu þurfa að taka mið af því,“ segir utanríkisráðherra.
Discussion about this post