Suðureyri – aðvörun frá lögreglunni, almannavörnum og Veðurstofunni
Þetta mikla vatnsveður undanfarna sólarhringa og síðustu klukkustundirnar hefur aukið hættuna á aurskriðum og grjóthruni úr hlíðum. Veðurstofan hefur verið að meta aðstæður fyrir ofan byggðina á Suðureyri m.t.t. þessa.
Skv. þeim athugunum er ekki talin mikil hætta á mannskæðum aurskriðum eða grjóthruni. Hins vegar eru íbúar hvattir til að fara varlega og að öllu með gát.
Veðurstofan hefur einkum verið að horfa á hús nr. 7 og 9 við Hjallabyggð og hús nr. 10, 12 og 14 við Túngötu.
Ekki er talin ástæða til að rýma þessi hús en ef íbúar vilja fara úr þeim meðan þetta ástand varir hefur RKÍ opnað móttöku í veitingastaðnum Fissermann, við Aðalgötu 14-16 á Suðureyri. Og þangað er öllum íbúum þessara húsa, sem og öðrum íbúum, velkomið að koma og dvelja.
Veðurspár gera ráð fyrir því að mikið dragi úr úrkomu nú upp úr hádeginu í dag. Staðan verður metin og upplysingar gefnar eftir því sem fram vindur.
16.07: Spáð er talsverðri úrkomu á Vestfjörðum, Ströndum í dag og á morgun.
Vaxandi norðaustanátt, 15-23 m/s síðdegis en norðan 13-20 á morgun. Snarpar vindhviður við fjöll, varasamt fyrir ökutæki sem taka á sig mikinn vind. Talsverð eða mikil rigning, einkum norðantil. Búast má við auknu afrennsi og vatnavöxtum í ám og lækjum og hætta á flóðum og skriðuföllum. Einnig er aukið álag á fráveitukerfi. Fólk er hvatt til að huga að niðurföllum til að forðast vatnstjón. Hætta er á skriðum og grjóthruni í bröttum hlíðum.
Meðfylgjandi mynd lögreglu er síðan 2014 þegar að aurskriða lokaði veginum á milli Ísafjarðar og Hnífsdals
