-5.2 C
Reykjavik
Fimmtudagur - 9. febrúar 2023
Auglýsing

Vörukarfan hækkaði í 6 af 8 verslunum á 6 mánaða tímabili

Auglýsing

Auglýsing

Nýjar fréttir

Auglýsing

Á 6 mánaða tímabili, frá lokum mars 2021 fram í byrjun október, hækkaði vörukarfa ASÍ í sex matvöruverslunum af átta. Vörukarfa ASÍ endurspeglar almenn matarinnkaup meðalheimilis. Þess ber að geta að hér eru einungis birtar upplýsingar um verðbreytingar milli verðmælinga. Ekki er því um beinan verðsamanburð að ræða þ.e.a.s. hvar ódýrustu vörukörfuna var að finna.

Mest hækkaði vörukarfan í Heimkaup, 3,4% en minnst í Krambúðinni og Kjörbúðinni, 0,5% í hvorri verslun fyrir sig. Vörukarfan lækkaði í einni verslun, Hagkaup um 0,6% og stóð í stað í einni verslun, Nettó. Vöruflokkurinn mjólkurvara, ostar og egg hækkaði nokkuð mikið í öllum verslunum eða á bilinu 3,1-8,4%. Verð á kjötvöru hækkaði einnig töluvert í meirihluta verslana. Verð á grænmeti og ávöxtum lækkaði í mörgum verslunum og eins verð á sykri, súkkulaði og annarri matvöru.

Vörukarfan hækkaði mest í Heimkaup
Þegar litið er til lágvöruverðsverslana má sjá að vörukarfan hækkaði minnst í Krónunni, 0,8% en mest í Bónus, 1,8% á meðan hún stóð í stað í Nettó. Vörukarfan hækkaði mest í Heimkaup á tímabilinu, 3,4%. Verð hækkaði í öllum vöruflokkum í Heimkaup nema einum en það er flokkurinn „önnur matvara“ sem lækkaði um 0,6%. Sá flokkur samanstendur af fiski, fitu og olíum, dósamat og þurrvöru. Mest hækkaði verð á grænmeti og ávöxtum í Heimkaup, 6,1% en verð á drykkjarvöru, kjötvöru og brauð- og kornvöru hækkaði á bilinu 4-5% í versluninni.

Verð hækkaði einnig í öllum vöruflokkum nema einum í Bónus en þar er það flokkur grænmetis og ávaxta sem lækkaði í verði á tímabilinu um 4,8%. Verð á hreinlætis- og snyrtivöru hækkaði einungis um 0,2%. Mest hækkaði verð á mjólkurvöru í Bónus, 6,1% og næst á eftir verð á kjötvöru, 4,9%. Vörukarfan lækkaði mest í Hagkaup, 0,6% en þar lækkaði verð í fimm vöruflokkum en hækkaði í þremur. Mest lækkaði verð á grænmeti og ávöxtum, 3,9% og verð á drykkjarvöru um 3,8%. Mest hækkaði verð á mjólkurvöru í Hagkaup, 3,4% og næst mest hækkaði verð á annarri matvöru, 2,1%.

Verð á mjólkurvöru og kjöti hækkar mest
Verð á mjólkurvörum, ostum og eggjum hækkaði nokkuð mikið á tímabilinu og í öllum verslunum. Mest hækkaði vöruflokkurinn í Iceland, 8,4% en minnst í Kjörbúðinni, 3,1%. Næst mest hækkaði vöruflokkurinn í Krónunni, 7,2% en þar á eftir kemur Bónus með 6,1% hækkun. Þess má geta að verðlagsnefnd búvara tók ákvörðun fyrr á árinu um hækkun á lágmarksverði mjólkur til bænda um 3,77% og tók hækkunin gildi þann 1. apríl 2021.

Kjötvara hækkaði í verði í sex verslunum af átta og voru verðhækkanirnar á bilinu 1-5%. Mest hækkaði verð á kjötvöru í Kjörbúðinni, 5% og næst mest í Bónus, 4,9%. Mest lækkaði verð á kjötvöru í Krónunni, 3,2% og næst mest í Krambúðinni, 2,4%. Auk grænmetis og ávaxta er kjötvara vöruflokkur sem getur sveiflast töluvert í verði.

Grænmeti og ávextir og sykraðar vörur lækka oftast í verði
Sá vöruflokkur sem lækkaði mest í verði er grænmeti og ávextir. Mest lækkaði verð í vöruflokknum í Bónus, 4,8% og næst mest í Nettó, 4,7%. Vöruflokkurinn hækkaði mest í Heimkaup, 6,1%. Verð á sykruðum vörum lækkaði í 5 verslunum af 8, mest í Nettó, 4,4% en mesta verðhækkunin í þessum vöruflokki var í Heimkaup, 2,7%.

Um könnunina
Verðkannanir á vörukörfunni voru gerðar 20.-30. mars 2021 og 25. september – 3. október 2021.
Verðlagseftirlit ASÍ mælir breytingar á verði vörukörfu sem getur endurspeglað almenn innkaup meðalheimilis. Vörukarfa ASÍ inniheldur allar almennar matar- og drykkjarvörur, t.d. brauðmeti, morgunkorn, pasta, kjöt, fisk, grænmeti, ávexti, pakkavörur, kaffi, gos, og safa. Við samsetningu vörukörfunnar voru hafðar til hliðsjónar vogir Hagstofunnar sem notaðar eru til útreiknings á vísitölu neysluverðs. Vogirnar segja til um hversu stór hluti tilteknir vöruflokkar eru af neyslukörfu meðal heimilis.

Verðbreytingar voru skoðaðar í eftirfarandi verslunum: Bónus, Krónunni, Nettó, Hagkaup, Kjörbúðinni, Iceland, Heimkaup og Krambúðinni.
Þess ber að geta að hér eru einungis birtar upplýsingar um verðbreytingar milli verðmælinga. Ekki er því um beinan verðsamanburð að ræða þ.e.a.s. hvar ódýrustu vörukörfuna var að finna. Einnig er rétt að athuga að skoðuð eru þau verð sem eru í gildi í verslununum á hverjum tíma og geta tilboð á einstaka vöruliðum því haft áhrif á niðurstöðurnar.

Óheimilt er að vitna í niðurstöðurnar í auglýsingum og við sölu nema með heimild ASÍ.