,,Við höfum nú þegar gert ráðstafanir um það hvert fjármunir félagsins verða fluttir, komi til þess“

,,VR er frjálst að færa sína sjóði og kostar það félagið ekki neitt. Ef rétt reynist að Kvika banki hefur ekkert með ákvarðanir Gamma/Almenna að gera, sem ég reyndar efast stórlega um, hefur bankinn sama frest til að rifta fyrirhuguðum kaupum á fyrirtæki sem svífst einskis þegar kemur að siðlausum gróðasjónarmiðum gagnvart almenningi.

Stjórn VR stendur fast á sínu. Við höfum nú þegar gert ráðstafanir um það hvert fjármunir félagsins verða fluttir, komi til þess, og mun það ekki hafa nokkur áhrif á ávöxtun fjármuna félagsins sé tillit tekið til árangurs bankans síðustu ár.“ Segir Ragnar Þór Ingólfsson.
Kvika er eig­andi fjár­mála­fyr­ir­tæk­is­ins Gamma og Al­menna leigu­fé­lagið er í eigu sjóða Gamma og segir VR í bréfi til Kviku að þess vegna sé tilmælunum beint að stjórn­end­a Kviku banka. VR sættir sig ekki við að Al­menna leigu­fé­lagið hafi hækkað leigu um tugþúsund krón­ur og gefið leigj­end­um fjóra daga til að samþykkja hækk­un­ina.
Krefst VR þess að áformin séu dreg­in til baka, en að öðrum kosti ætli fé­lagið að taka allt sitt fé úr eign­a­stýr­ingu hjá Kviku banka, en um er að ræða 4,2 millj­arða. VR hefur farið  yfir gögn með sam­skipt­um Al­menna leigu­fé­lags­ins við leigj­end­ur þar sem án fyr­ir­vara eða hald­bærra raka sé kraf­ist tugþúsunda hækk­un­ar leigu og leigj­end­um sett­ir þeir afar­kost­ir að samþykkja hækk­un­ina eða missa hús­næðið. Um­hugs­un­ar­frest­ur er gef­inn leigjendum sem eru aðeins fjór­ir dag­ar.
VR seg­ir slíka hækk­un gera vænt­ar hækk­an­ir VR í samn­ingaviðræðum við Sam­tök at­vinnu­lífs­ins að engu. „Það er varla hægt að lýsa þessu með öðrum orðum en sem grimmd, taum­lausri græðgi og mann­vonsku,“ seg­ir í bréfi VR og veitir Kviku banka fjög­urra daga frest til þess að láta leigu­fé­lagið hætta við hækk­un­ina. „Hafi það ekki verið gert inn­an fjögra daga mun VR taka allt sitt fé úr eign­a­stýr­ingu hjá Kviku banka sem er um 4,2 millj­arðar króna.“

Hér er svo bréfið sem að var sent til Kviku:

Í ljósi þess að fjármálafyrirtækið Gamma er í eigu Kviku banka, og stýrir Almenna leigufélaginu, beinum við orðum okkar til stjórnenda Kviku banka.
VR hafa borist gögn með samskiptum Almenna leigufélagsins við nokkra leigjendur sína þar sem enn á ný er án fyrirvara, eða nokkurra haldbærra raka, krafist tugþúsunda hækkunar leigu og leigjendum settir þeir afarkostir að samþykkja hækkunina ellegar vera hent á götuna án húsaskjóls. Umhugsunarfrestur sem leigjendum er gefinn til að samþykkja eða hafna tilboðinu er einungis fjórir dagar. Ljóst er að tugþúsunda hækkun á leigu gerir væntar hækkanir sem VR er nú að semja um við Samtök atvinnulífsins að engu.
Það er varla hægt að lýsa þessu með öðrum orðum en sem grimmd, taumlausri græðgi og mannvonsku.
Stjórn VR sættir sig ekki við þetta. Við kjósum að láta ekki bendla okkur við aðila sem beita slíkum meðulum og höfum tekið þá ákvörðun að veita Kviku banka fjögurra daga frest til þess að láta Almenna leigufélagið hætta þessum grimmdarverkum og koma því þannig fyrir að leiga félagsins hækki ekki umfram verðlag og að leigjendum verði tryggt húsnæðisöryggi. Hafi það ekki verið gert innan fjögra daga mun VR taka allt sitt fé úr eignastýringu hjá Kviku banka sem er um 4,2 milljarðar króna.
Hér fyrir neðan er dæmi um póst frá Almenna leigufélaginu til leigjanda sem sendur var fjórum dögum fyrir 5. febrúar.
„Góðan dag,
Nú líður að lokum leigusamnings þíns um íbúðarhúsnæði við xxxxxx nr. xx, 108 – Reykjavík og langar okkur því að bjóða þér að endurnýja hann. Samningurinn rennur út þann 31.03.2019. Við getum boðið þér tveggja ára leigusamning á kr. xxx.xxx,- á mánuði. Vinsamlegast staðfestu endurnýjun fyrir þriðjudaginn 5. febrúar með því að svara þessum pósti. Við biðjum þig jafnframt um að láta okkur vita viljir þú ekki endurnýja samninginn.
Endilega vertu í sambandi við okkur sem fyrst með hvað þú hyggst gera.“