Karlmaður á sextugsaldri vopnaður þremur byssum skaut sex manns til bana í smábæ Mississippi-ríki í Bandaríkjunum í gær. Fyrrverandi eiginkona mannsins er meðal hinna látnu. Richard Dale Crum er talinn hafa verið einn að verki og hefur lögreglan handtekið hann, fjallað var um málið á mbl.is.
Samkvæmt New York Times hófust skotárásirnar klukkan 11 að staðartíma í gærmorgun þegar að sá grunaði er sagður hafa skotið mann til bana á bensínstöð. Ekki er vitað um tengsl milli þeirra.
Því næst er talið að hann hafi farið á heimili í nágrenninu þar sem hann skaut fyrrverandi eiginkonu sína til bana og særði unnusta hennar. Þá segja rannsakendur Crum hafa stefnt að húsi nágranna sinna þar sem að hann skaut mann sem talinn er hafa verið stjúpfaðir hans og konu sem ekki er vitað hver er.
Þá skaut hann tvo aðila til viðbótar í nágrenninu en annað fórnarlambið sat í bíl og hinn var gangandi vegfarandi.