Fjármála- og efnahagsráðherra hefur ákveðið að hefja framhald sölumeðferðar á hlutum í Íslandsbanka í samræmi við tillögu Bankasýslu ríkisins frá 20. janúar sl. Ráðherra sendi Bankasýslunni bréf um ákvörðunina í dag.
Ákvörðun ráðherra byggir á fyrirliggjandi greinargerð sem lögð var fyrir fjárlaganefnd og efnahags- og viðskiptanefnd Alþingi og felur í sér að bankinn skuli seldur í áföngum fyrir árslok 2023. Umsagnir nefndanna liggja nú fyrir, en meiri hlutar þeirra beggja mæla með því að hafist verði handa við framhald sölu. Þá telur Seðlabankinn að telja megi að jafnræði bjóðenda verði tryggt og er salan talin hafa takmörkuð áhrif á gjaldeyrismarkað, gjaldeyrisforða bankans og laust fé í umferð.
Framhald sölu verður háð því að markaðsaðstæður séu hagfelldar. Þrátt fyrir að ófriður í Austur Evrópu hafi haft margháttuð áhrif á eigna- og fjármálamarkaði á heimsvísu telur Bankasýslan að það raski ekki meginforsendum söluáformanna að svo stöddu. Þannig hafi verð á hlutum í bankanum ekki verið hærra en það er um þessar mundir.
Hlekkir á efni sem tengist fyrirhugaðri sölumeðferð:
- Bréf fjármála- og efnahagsráðuneytisins til Bankasýslu ríkisins 18.3.2022
- Greinargerð fjármála- og efnahagsráðuneytisins frá 10.2.2022
- Umsögn efnahags- og viðskiptanefndar um greinargerð fjármála- og efnahagsráðherra um framhald sölu á hlutum ríkisins í Íslandsbanka
- Umsögn fjárlaganefndar vegna framhalds sölumeðferðar á eignarhlutum Íslandsbanka hf.
- Umsögn Seðlabanka Íslands vegna framhalds sölumeðferðar á eignarhlutum Íslandsbanka hf.
- Tillaga Bankasýslu ríkisins um sölumeðferð á eftirstæðum eignarhlut í Íslandsbanka hf.
