Kópavogur og Reykjanesbær hafa samþykkt að ganga til samninga við endurvinnslufyrirtækið Pure North um uppsetningu grenndarstöðva í sveitarfélögunum tveimur þar sem tekið verður á móti endurvinnsluefnum frá heimilum. Um er að ræða þriggja ára tilraunaverkefni sem hefur hlotið nafnið „Fáðu greitt fyrir að flokka.“ Gert er ráð fyrir að allt að fimm móttökustöðvar verði reistar í september hjá sveitarfélögum og fyrirtækjum og fleiri fylgi í kjölfarið en samningaviðræður standa yfir við fleiri sveitarfélög og fyrirtæki.
Að sögn Sigurðar Halldórssonar, forstjóra Pure North eru grenndarstöðvarnar umbylting á núverandi úrgangsstjórnunarkerfi en íbúar munu fá greitt fyrir að flokka sín endurvinnsluefni og skila þeim í grenndarstöðvar Pure North. Slíkur hvati hefur gefist vel við skil á drykkjarumbúðum um árabil og dæmi erlendis sanna að fjárhagsleg hvatakerfi virka best til að fá íbúa til að skila efnum í endurvinnslu, bæta árangur í flokkun og auka hreinleika endurvinnsluefna. Flokkunarleiðbeiningar, greiðsla og önnur upplýsingagjöf fer fram í gegnum smáforrit sem Pure North er að þróa.
Endurvinnsluhlutfall heimilisúrgangs á Íslandi er með því lægsta í Evrópu eða um 27% miðað við árið 2019. Átaks er þörf ef Íslandi á að takast að standa við alþjóðlegar skuldbindingar á allra næstu árum en ný markmið um endurvinnsluhlutfall heimilisúrgangs munu hækka úr
50% í 65% á næstu 13 árum. Að sögn Sigurðar skapar úrgangsstjórnunarkerfi Pure North einstakt tækifæri til að hækka endurvinnsluhlutfall heimilisúrgangs hratt með því að höfða til ábyrgðar einstaklinga að flokka og skila úrgangi til endurvinnslu og fá greitt fyrir. Með kerfinu myndast einnig hringrás endurvinnsluefna og í fyrsta sinn á Íslandi gefst tækifæri til að rekja efni frá því að þau eru búin til og þar til þau eru komin aftur í notkun sem endurnýtt efni.
Íbúar geta fylgst með sínum árangri í flokkun og skilum í gegnum smáforrit og sveitarfélög fá bætt aðgengi að upplýsingum um uppruna, magn og gæði efna sem skila sér í endurvinnslu. Þetta mun mynda aðgengi að gögnum sem geta skilað sér í betri ákvarðanatöku til að minnka umhverfisáhrif og kostnað við úrgangsmeðhöndlun.
Pure North er endurvinnslu- og ráðgjafarfyrirtæki. Fyrirtækið endurvinnur megnið af því heyrúlluplasti sem tilfellur á Íslandi ásamt öðrum plastefnum og stefnir á endurvinnslu 2.500 tonna á árinu 2022. Það magn gæti orðið um helmingur alls þess plasts sem er endurunnið frá Íslandi í dag. Endurvinnslutækni fyrirtækisins nýtir jarðgufu í ferlið og sýnt hefur verið fram á með vistferilsgreiningu og útgáfu umhverfisyfirlýsingar að ferli Pure North skilar um
82% lægra kolefnisspori á hvert unnið tonn samanborið við sambærilega endurvinnslu í Evrópu.
