Í ágúst næstkomandi geta landsmenn aftur nálgast upplýsingar í álagningarskrá á skrifstofu Skattsins (áður Ríkisskattstjóra), um hvað aðrir greiddu í skatt á liðnu ári. Ríflega helmingur er fylgjandi því að landsmenn geti nálgast upplýsingar um hvað aðrir greiða í skatt, eða rúmlega 52%. Rösklega fimmtungur er aftur á móti andvígur því, eða nær 22%. Ríflega fjórðungur segist loks hvorki fylgjandi né andvígur því, eða tæp 26%.
Karlar eru frekar fylgjandi því en konur að landsmenn geti nálgast upplýsingar um hvað aðrir greiða í skatt. Munur kemur fram eftir því hvað fólk kysi ef kosið yrði til Alþingis nú. Hlutfall þeirra sem eru fylgjandi því er lægst meðal þeirra sem kysu Sjálfstæðisflokkinn, næstlægst meðal þeirra sem kysu Framsóknarflokkinn en þar á eftir koma þau sem kysu Viðreisn, Vinstri græn eða Miðflokkinn. Það er svo hærra meðal þeirra sem kysu Samfylkinguna, enn hærra meðal þeirra sem kysu Pírata en hæst meðal þeirra sem kysu aðra flokka.
Spurt var:
Ert þú fylgjandi eða andvíg(ur) því að landsmenn geti nálgast upplýsingar um hvað aðrir greiða í skatt?
Niðurstöður sem hér birtast eru úr netkönnun sem gerð var dagana 3.-14. júní 2021.
Þátttökuhlutfall var 55,2%, úrtaksstærð 1.668 einstaklingar 18 ára eða eldri af öllu landinu valdir af handahófi úr Viðhorfahópi Gallup.
Discussion about this post