Lögreglumenn á Suðurlandi handtóku í gærkvöld, þrjá einstaklinga á bíl sem þeir eru taldir hafa stolið á Rangárvöllum. Þeim var veitt eftirför eftir Suðurlandsvegi að Selfossi en kusu að sinna í engu stöðvunarmerkjum lögreglu og óku á stundum með um og yfir 140 km/klst hraða.
Að endingu óku þeir yfir naglamottu sem komið var fyrir við Selfoss og voru í framhaldi af því handteknir og færðir á lögreglustöð. Allir sluppu ómeiddir, bæði meintir brotamenn, aðrir vegfarendur og viðbragðsaðilar sem að aðgerðum komu, hvort sem þeir tilheyra lögreglu, slökkviliði eða sjúkraflutningum. Nú tekur við rannsókn málsins og ekki að vænta frekari frétta af málinu í kvöld.
Umræða
