,,Þessi sást í Mjódd! Náði ekki að góma hann.“ Segir á lokaðri síðu á fésbókinni þar sem þennan vafasama máv bar á góma en hann virðist með einhverjum hætti hafa náð að góma góm frá eigandanum.
Eiganda gómsins er bent á að ætli hann að góma mávinn með góminn, þá sé ekkert annað í boði en fara í Mjóddina og svipast um eftir honum en ekki hefur verið formlega lýst eftir hinum slynga mávi og ekki er kunnugt um að hann hafi verið gómaður, né að gómurinn hafi fundist.
Til glöggvunar má sjá mynd hér að neðan af bæði gómnum og þeim sem hefur hann í sinni vörslu í dag. Ábendingar um dvalarstað mávsins eða frekari fréttir af gómnum eru vel þegnar og nokkuð víst að eigandinn bíður spenntur eftir frekari fréttum sem af skiljanlegum ástæðum hefur ekki komið upp einu orði undanfarið af undrun en aðallega gómleysi og biður fólk að deila svo gómurinn komist aftur á sinn stað.
