2.8 C
Reykjavik
Föstudagur - 27. janúar 2023
Auglýsing

Sumardagurinn fyrsti haldinn hátíðlegur í Hafnarfirði – fullt í boði fyrir alla aldurshópa

Auglýsingspot_img

Nýjar fréttir

Auglýsingspot_img
Eftir tvo ár sem lituð hafa verið af heimsfaraldri er loksins hægt að fagna komu sumars með formlegum hætti. Menningar- og þátttökuhátíðin Bjartir dagar 2022 hófst í gær í Hafnarfirði með samsöng nemenda, vali á bæjarlistamanni 2022 og tónlistarhátíðinni HEIMA. Bjartir dagar munu halda áfram og verða hattur fjölbreyttra hátíðarhalda í Hafnarfirði næstu vikur og mánuði.

Mikil og fjölbreytt dagskrá er á Sumardaginn fyrsta og um helgina sem allir áhugasamir eru hvattir til að taka virkan þátt í s.s. fuglaskoðun í Höfðaskógi, víðavangshlaup Hafnarfjarðar í hjarta Hafnarfjarðar, opnunarhátíð Lífsgæðaseturs St. Jó, badminton og borðtennis, alþjóðleg söngstund, perlukóðun, skátamessa, skrúðganga, fjölskyldudagskrá á Thorsplani og tónleikar á bókasafni.

Dagskrá í Hafnarfirði á Sumardaginn fyrsta

  • Kl. 11-13 Fuglaskoðun í Höfðaskógi. Lagt af stað frá Þöll við Kaldárselsveg. Létt ganga um skóginn og nágrenni fyrir alla fjölskylduna. Nánari upplýsingar á heimasíðu Skógræktarfélags Hafnarfjarðar eða í síma 555-6455.
  • Kl. 12 Víðavangshlaup Hafnarfjarðar í miðbæ Hafnarfjarðar. Upphitun hefst á Thorsplani kl. 12. Hlaupið verður eftir Strandgötu og skipt í aldursflokka að lokinni upphitun. Ekkert þátttökugjald er í hlaupið og skráning fer fram með því að mæta á staðinn. Sigurvegarar í flokkum fá bikara og allir keppendur verðlaunapeninga sem eru gefnir af Hafnarfjarðarbæ. Að hlaupi loknu mun frjálsíþróttadeild FH kynna frjálsar íþróttir á Thorsplani þar sem hægt verður að prófa langstökk og kúluvarp.
  • Kl. 12-15 Opnunarhátíð Lífgæðaseturs St. Jó. Hafnfirðingum og nærsveitunugum er boðið í heimsókn á Lífsgæðasetur St. Jó. á Sumardaginn fyrsta. Þetta fallega og sögufræga hús hefur farið í gegnum miklar endurbætur og nú iða þrjár af fjórum hæðum hússins af lífi þar sem félagasamtök, fyrirtæki og einstaklingar sinna fjölbreyttri starfsemi sem öll hefur það að markmiði að bæta lífsgæði fólks.
  • Kl. 13-15.  Badminton og borðtennis í íþróttahúsinu við Strandgötu. Gestum og gangandi er boðið að prófa badminton og borðtennis hjá Badmintonfélagi Hafnarfjarðar í íþróttahúsinu við Strandgötu.
  • Kl. 13-18. Opið hús hjá Siglingaklúbbnum Þyt, Strandgötu 88. Byrjendum og vönum siglingamönnum er boðið að sigla kayak (9 ára og eldri) eða árabátum og þeir sem hafa reynslu geta siglt kænum ef veður leyfir.
  • Kl. 13 Alþjóðleg söngstund og perlukóðun á Bókasafni Hafnarfjarðar. Söngstund á ensku með alvöru prinsessu og Intrix mætir með perlukóðunarsmiðju fyrir alla. Engin skráning, bara mæta og leika! Sögusmiðja í barnadeild til kl. 15.
  • Kl. 13 Skátamessa í Víðistaðakirkju. Sr. Bragi sóknarprestur sér um messuna
  • Kl. 13:45 Skrúðganga frá Víðistaðakirkju að Thorsplani. Gengið verður niður Garðaveg og til hægri inn Hraunbrún, Vesturgötu í átt að Strandgötu í gegnum Bæjartorg og endað á Thorsplani undir lúðrablæstri Lúðrasveitar Tónlistarskóla Hafnarfjarðar.
  • Kl. 14-16 Fjölskyldudagskrá á Thorsplani í umsjón skátafélagsins Hraunbúa. Skemmtileg og fjölbreytt dagskrá fyrir alla fjölskylduna. Dansíþróttafélag Hafnarfjarðar sýnir dans, brot úr Litlu Hryllingsbúðinni í Víðistaðaskóla, hljómsveitin Enter name úr Lækjarskóla og fleiri tónlistaratriði. Hoppukastalar á svæðinu fyrir aftan Fjörð.
  • Kl. 16 Tónleikar á Bókasafni Hafnarfjarðar – The Road goes ever on. Hópur ungra listamanna flytur söngljóðaflokk úr Hringadróttinssögu Tolkiens í tónsetningu Donald Swann. Verkefnið er styrkt af Hafnarfjarðarbæ í tilefni af 100 ára afmæli Bókasafns Hafnarfjarðar, og er unnið í samstarfi við Söngskóla Sigurðar Demetz.

Gakktu í bæinn á föstudagskvöld

Kraftur og gróska í listalífinu í Hafnarfirði hefur meðal annars endurspeglast í viðburðinum Gakktu í bæinn þegar listamenn, hönnuðir og handverksfólk á svæðinu frá smábátahöfninni að miðbæ Hafnarfjarðar opna vinnustofur sínar og bjóða gesti og gangandi velkomna í heimsókn. Þá verða einhverjar verslanir í miðbænum opnar fram á kvöld og tilvalið að versla einstaka hönnun í hjarta Hafnarfjarðar. Ýmsir tónlistarviðburðir skipa stóran sess í dagskrá Bjartra daga í ár líkt og fyrri ár. Tónlistarmenn, íþróttafélög og ýmis félagasamtök standa að fjölbreyttum viðburðum og menningarstofnanir bæjarins bjóða upp á skemmtilega dagskrá.