GARÐABÆJARSAMFÉLAGIÐ

​

Ágúst Karlsson sem skipar 19. sæti á lista Miðflokksins í Garðabæ, skrifar.

Afgerandi þættir í komandi kosningum til sveitastjórna, nú sem áður, eru umræður og áróður um eigið ágæti, en einnig um vanhæfi mótherjanna. Margt gott hefur verið framkvæmt af fyrrverandi bæjarstjórnum. Það þýðir samt sem áður ekki að mörg málefni hafi mátt betur fara.
Miðflokkurinn ætlar að ná til fjöldans með stefnumálum sínum, m.a. í félagslegum málefnum og væntir góðs árangurs. Miðflokkurinn höfðar því til bæjarbúa í komandi kosningum og bæjarbúar einnig til Miðflokksins.
Meðal helstu áherslumála má nefna aukin atvinnutækifæri innan bæjarmarkanna. Núverandi staða er þannig að langstærstur hluti vinnandi fólks sækir atvinnu sína í önnur bæjarfélög. Þessu væri æskilegt að breyta enda eykur það sjálfbærni bæjarins.
Nýtt sjúkrahús við Vífilstaði myndi breyta þar miklu, en einnig væri æskilegt að stuðla að myndun smærri fyrirtækja í léttum iðnaði, framleiðslu og þjónustu. Öflugra skólastarf á breiðum grunni er einnig ofarlega á stefnuskrá. Greiða þarf götu unga fólksins með tilliti til fastrar búsetu með beinni eða óbeinni fjárhagslegri fyrirgreiðslu varðandi íbúðarhúsnæði.
Bæjarsjóður er vel stæður fjárhagslega. Það er augljóst mál að auka má margháttaða þjónustu við eldri borgara, gamalgróinna íbúa bæjarsins, sem byggt hafa bæinn frá grunni og stuðlað að velgengninni með framlagi sínu til bæjarsjóðs og bæjarmálanna.
Við sem byggðum bæinn upp frá upphafi teljum okkur eiga að njóta ávaxtanna. Við viljum auka þjónustustig við þá sem vilja búa sem lengst heima hjá sér, enda sparar það hjúkrunarrými fyrir aldraða og þar með bæjarfélaginu stórar fjárhæðir.
Nefna mætti þar t.d. hjálp við viðhald lóða og garða, enda stuðlar það að fegurra umhverfi. Eins mætti nefna einstaklingsmiðaða heimahjúkrun eða vitjanir hjúkrunarfræðinga þar sem það á við.
Þessu ætlar fulltrúar Miðflokksins að vinna að og framkvæma þegar þeir fá aðstöðu til í bæjarstjórninnni.
Ágúst Karlsson skipar 19. sæti á lista Miðflokksins í Garðabæ