Spáð allt að 20 stiga hita

 
Í dag er útlit fyrir norðan og norðvestan 3-8 m/s. Búast má við skúrum í flestum landshlutum í dag, síst þó vestast á landinu. Hiti 7 til 16 stig, hlýjast á Suðurlandi. Vestan 3-8 á morgun, bjart með köflum og yfirleitt þurrt. Hiti 10 til 17 stig. Norðlægari með svolítilli rigningu austanlands framan af morgundegi og svalara, en rofar til þar seinnipartinn. Á sunnudag og fram í miðja næstu viku er útlit fyrir að vestlæg átt verði ríkjandi og hlýr loftmassi færist yfir landið. Það verður þá bjart og hlýtt á austanverðu landinu og kominn tími til, á þeim slóðum hefur verið sólarlítið það sem af er sumri og hiti með lægra móti. Vestanlands verður meira og minna skýjað og einhver væta eftir helgi. Sú væta er líkleg til að vera á formi súldar og ekki rigning nema að litlu leyti. Ekki er víst að úrkomumagnið verði nægjanlegt til að bleyta almennilega í þurrum gróðri eða hressa upp á vatnslitlar laxveiðiár.
Besta veðrið virðist ætla að verða um og eftir helgi fyrir austan þar sem að er spáð allt að 20 stiga hita á austanverðu landinu og háar hitatölur verða einnig á Suðurland.
Veðurhorfur á landinu
Hæg norðlæg eða breytileg átt. Skúrir í flestum landshlutum í dag, en úrkomulítið vestantil. Bjart að mestu sunnan- og vestanlands á morgun og þurrt að kalla. Hiti 7 til 17 stig, hlýjast á Suðurlandi. Spá gerð: 21.06.2019 09:07. Gildir til: 23.06.2019 00:00.
Veðurhorfur á landinu næstu daga
Á sunnudag og mánudag:
Suðvestan 5-10 og víða léttskýjað, en skýjað að mestu vestanlands. Hiti 11 til 19 stig, hlýjast um landið austanvert.
Á þriðjudag og miðvikudag:
Ákveðin vestanátt. Skýjað á vesturhelmingi landsins og dálítil rigning eða súld af og til. Hiti 10 til 14 stig. Bjartviðri austantil með hita 15 til 20 stig.
Á fimmtudag:
Vestanátt framan af degi en gengur í norðan 5-10 síðdegis. Líkur á dálítilli rigningu eða súld í flestum landshlutum. Kólnandi veður.
Spá gerð: 21.06.2019 07:40. Gildir til: 28.06.2019 12:00.