Norðanátt allhvöss eða hvöss um allt land og él og snjókoma fyrir norðan og austan

Hugleiðingar veðurfræðings
Veðurspárnar bjóða ekki uppá miklan breytileika þessa dagana. Norðan og norðaustanáttin allhvöss eða hvöss um allt land. Él og snjókoma á köflum fyrir norðan og austan, en lengst af skýjað með köflum og þurrt annars staðar. Vægt frost, en sums staðar frostlaust við ströndina, einkum austan- og suðaustantil.
Þessi texti gæti allt eins átt við næstu daga, en þó eru spár að gera ráð fyrir að úrkomubakki nálgist landið úr suðri á mánudag og þriðjudag og gæti þá snjóað um tíma um landið sunnanvert. Eins og staðar er núna er nákvæm staðsetning eða magn óráðið, eða jafnvel gæti þetta endað á að ná ekki inná land.

Veðurhorfur á landinu
Norðan 8-15 m/s og 10-18 síðdegis, en sums staðar hvassari vindstrengir syðra. Él eða snjókoma á norðanverðu landinu, en bjart sunnan heiða.
Heldur hvassari á morgun. Samfeld snjókoma NA- og A-lands, þurrt að kalla um landið S-vert, en annars él.
Frost 1 til 6 stig, en allvíða frostlaust syðst og austast. Spá gerð: 22.01.2021 04:06. Gildir til: 23.01.2021 00:00.

 Gul viðvörun  vegna veðurs: Strandir og norðurland vestra, Norðurland eystra, Austurland að Glettingi og Austfirðir

Veðurhorfur á landinu næstu daga
Á laugardag:
Norðan 13-20 m/s og snjókoma eða éljagangur, hvassast við SA-ströndina, en skýjað með köflum og þurrt að kalla sunnan heiða. Frost víða 0 til 5 stig, en sums staðar frostlaust við sjávarsíðuna.

Á sunnudag:
Norðan 8-15 m/s og él, en léttskýjað S- og V-lands. Frost 1 til 8 stig, minnst syðst.

Á mánudag:
Norðankaldi og víða dálítil él, en austlægari syðst og líkur á snjókomu þar. Harðnandi frost.

Á þriðjudag, miðvikudag og fimmtudag:
Útlit fyrir áframhaldandi norðaustlæga átt með snjókomu eða éljum, en dregur heldur úr frosti. Spá gerð: 21.01.2021 20:07. Gildir til: 28.01.2021 12:00.