Dæmdur fyrir manndráp af gáleysi vegna sölu á megrunar- og fæðubótarefni með eiturefni

Nýlega féll dómur í Bretlandi yfir manni sem seldi efnið DNP á netinu sem fæðubótarefni til megrunar. Ungur háskólanemi lést eftir að hafa innbyrt efnið. Seljandi var dæmdur fyrir manndráp af gáleysi og fyrir að selja hættulegt efni til manneldis. Varað er við neyslu á fæðubótarefnum sem innihalda DNP.Árið 2015 lést 21 árs háskólanemi á spítala eftir að hafa tekið 8 töflur af efninu 2,4-dínítrófenól eða DNP. Framleiðsla og sala á DNP til manneldis er ólögleg. Þetta er í fyrsta skipti sem dómur fellur í Bretlandi fyrir að selja DNP til manneldis.
„Þessi sakfelling sendir skýr skilaboð til þeirra sem reyna að hagnast af ólöglegri sölu eiturefna til manneldis“, er haft eftir starfsmanni bresku matvælastofnunarinnar FSA. Rannsókn FSA kom upp um hinn sakfellda.
Matvælastofnun hefur ítrekað varað við neyslu á DNP, sem enn virðist finnast á markaði. Efnið er mjög eitrað og ætti aldrei að neyta vegna þeirra alvarlegu aukaverkana sem því fylgja. Sala á fæðubótarefnum/matvælum sem innihalda DNP er ólögleg skv. matvælalögum.
Þeir sem verða varir við vörur sem innihalda 2,4-dínítrófenól (DNP) og eru seldar eru hér á landi í gegnum vefsíður eða í annarskonar sölu eru hvattir til að senda Matvælastofnun ábendingu eða upplýsa heilbrigðiseftirlitið á viðkomandi svæði.
https://gamli.frettatiminn.is/2018/08/09/lifshaettulega-efni-enn-til-solu-sem-fitubrennsluefni/