Samtök umboðsmanna barna í Evrópu (ENOC) héldu sína árlegu ráðstefnu og ársfund í Hörpu í Reykjavík dagana 19.-21. september sl. Í samtökum umboðsmanna barna í Evrópu eiga flest embætti umboðsmanna barna í Evrópu aðild og eru þau afar mikilvægur vettvangur fyrir alþjóðlega samræðu og samstarf um réttindi barna. Ráðstefnuna sóttu um 90 fulltrúar frá rúmlega 30 embættum umboðsmanna barna frá jafnmörgum Evrópulöndum.
Umhverfisréttlæti út frá réttindum barna
Meginþema ráðstefnunnar í ár var umhverfisréttlæti út frá réttindum barna og var yfirskrift hennar Shaping the Future: Children‘s Rights in a Climate Crisis.
Meðal fyrirlesara á ráðstefnunni voru Sævar Helgi Bragason, umhverfisfræðari, Sigurlaug Arnardóttir frá Landvernd og Laura Lundy, prófessor og einn fremsti sérfræðingur í þátttöku barna sem kynnti skýrslu sem unnin var fyrir ENOC í tilefni ráðstefnunnar. Sævar Helgi fjallaði um leiðir til að valdefla og fræða börn um umhverfismál á áhrifaríkan máta og Sigurlaug um verkefnið Ungt umhverfisfréttafólk (Young reporters for the Enviroment) sem er vettvangur fyrir ungt fólk m.a. til að kynna sér umhverfismál með gagnrýnum hætti og kynntu nokkur ungmenni sínar vinningstillögur í því verkefni. Þá söng Jökull Jónsson, tónlistarmaður og loftlagsaktivisti nokkur af sínum lögum um umhverfismál við góðar undirtektir, meðal þeirra laga sem hann flutti var Aðgerðir strax!
Þátttaka ungmenna
Áhersla var lögð á að fjalla um rétt barna til þátttöku og áhrifa í stefnumótun og ákvarðanatöku í umhverfis- og loftslagsmálum en ekki síður á reynslu barna af því að taka þátt í baráttunni fyrir umhverfi og náttúru í einstökum Evrópuríkjum sem og á alþjóðavettvangi.
Á vegum samtaka evrópskra umboðsmanna starfar einnig ENYA, evrópsk samstarfsnet ráðgjafarhópa barna, og taka fulltrúar ENYA mikinn þátt í starfi samtakanna, ekki síst á árlegri ráðstefnu ENOC. Að þessu sinni tóku 15 ungmenni þátt frá fjölmörgum Evrópulöndum. Þátttaka þeirra fólst meðal annars í að móta og kynna tillögur sínar um umhverfisréttlæti og ræddu þau einnig hvernig umboðsmenn barna og stjórnvöld geta stutt betur við börn í baráttu sinni.
Auk þeirra tóku fulltrúar úr ráðgjafarhópi umboðsmanns barna og ungmennaráði heimsmarkmiðanna þátt í panelumræðum ásamt Svandísi Svavarsdóttur, matvælaráðherra, þar sem þau komu á framfæri áhyggjum sínum af náinni framtíð í kjölfar loftslagsbreytinga.
Ársfundur umboðsmanna barna haldinn í Iðnó
Ársfundur samtakanna fór fram miðvikudaginn 21. september í Iðnó. Á ársfundinum tók Salvör Nordal, umboðsmaður barna við formennsku samtakanna, en hún var kosinn formaður stjórnar ENOC á síðasta ári og hefur setið í stjórn samtakanna undanfarin ár. Á fundinum var einnig kosinn nýr formaður sem tekur við á ársfundi samtakanna sem fer fram í Belgíu að ári liðnu.
Nánar um ENOC – Samtök umboðsmanna barna í Evrópu
ENOC eru óhagnaðardrifin heildarsamtök umboðsmanna barna og annarra sjálfstæðra stofnana sem hlúa að réttindum barna. Í samtökunum eru 43 stofnanir í 34 löndum Evrópu.
Discussion about this post