Þakkir til íslenskra blóðgjafa frá starfsfólki Blóðbankans

Starfsfólk Blóðbankans vill þakka þeim fjölmörgu blóðgjöfum sem hafa lagt leið sína í Blóðbankann á síðustu vikum og mánuðum til að tryggja öryggi sjúklinga á heilbrigðisstofnunum um land allt.

Núna þegar blóðsöfnun er að ljúka að kvöldi Þorláksmessu er ljóst að öryggisbirgðir rauðkorna hafa náð að komast yfir okkar öryggismörk (400 einingar). Kærar þakkir til allra blóðgjafa sem hafa gert þetta mögulegt.

Gjöf ykkar bjargar mannslífum.

Á Íslandi eru í dag 6-7.000 blóðgjafar sem gefa blóð sem sjálfboðaliðar, án nokkur endurgjalds. Gjöf þeirra er ómetanleg. Frá því að notkun blóðs fór að aukast í byrjun október 2021 hafa 2.700 blóðgjafar komið og gefið blóð. Úr heilblóði blóðgjafa eru unnin rauðkorn, blóðflögur og blóðvökvi (plasma). Að auki hafa 200 blóðflögugjafar gefið blóðflögur með hjálp sérstakrar blóðfrumuskilju (aferesis), en blóðflögur eru mikið notaðar við meðferð krabbameina, blóðsjúkdóma og í stórum skurðaðgerðum.

Við biðjum allan almenning, sjúklinga og ættingja þeirra, stjórnendur heilbrigðisþjónustu…………alla Íslendinga, að segja lágmælt en ákveðið „TAKK, kæri blóðgjafi“ þegar þeir teygja sig undir jólatréð á Aðfangadag. Öll höfum við átt eða eigum ástvin(i) eða ættingja sem hafa þurft á blóði að halda í heilbrigðisþjónustunni. Án blóðgjafa hefði það ekki verið mögulegt.

„Takk kæri blóðgjafi“………….lágmælt en ákveðið. Þökk sé okkar frábæru blóðgjöfum er mögulegt að veita nútíma heilbrigðisþjónustu á Íslandi. Þökk sé okkar blóðgjöfum þá hefur Grettistaki verið lyft á síðustu vikum og mánuðum.

Blóðgjöf er lífgjöf

PS, Alla daga ársins, árið um kring eru notaðar að meðaltali 30 einingar rauðkorna…………á degi hverjum. Sjúklingar landsins munu án efa verða þakklátir ef virkir blóðgjafar koma í Blóðbankann milli jóla og nýárs til að tryggja öryggisbirgðir blóðs fyrir áramótin. Sjá allar upplýsingar á heimasíðu okkar

Þeir sem vilja gerast blóðgjafar finna sömuleiðis allar upplýsingar á heimasíðu Blóðbankans
www.blodbankinn.is og upplýsingar um heilsufarsskilmerki blóðgjafa www.blodgjafi.is
Gjöfin sem gleður 😊  Gjöfin sem gefur líf 😊

Með kveðju og þakklæti frá starfsfólki Blóðbankans fyrir hönd þeirra 2.500 sjúklinga sem þiggja blóð á ári hverju

Starfsfólk Blóðbankans