Rétt fyrir klukkan hálf tvö í nótt mældist jarðskjálfti upp á 3.4 stig við Krísuvík. Samkvæmt upplýsingum frá Veðurstofu Íslands fylgdu nokkrir eftirskjálftar í kjölfarið. Þeir mældust allir um eða undir 1 að stærð. Íbúar í Kópavogi, Garðabæ og Hafnarfirði fundu fyrir skjálftanum.
Lýsing á skjálftavirkni vikunnar
Um 320 jarðskjálftar mældust með SIL-mælakerfi Veðurstofu Íslands í vikunni, nokkru fleiri en í fyrri viku, þegar um 280 jarðskjálftar mældust. Stærsti skjálfti vikunnar var 3,0 stig að stærð um 12 km norðaustur af Grímsey, 13. ágúst kl 19:36. Engar tilkynningar bárust um að skjálftinn hafi fundist í Grímsey. Talsvert meiri virkni var á Lokahrygg í Vatnajökli þessa vikuna, borið saman við vikuna á undan en færri skjálftar voru staðsettir í og við Grímsvötn í þessari viku. Fjórir grunnir jarðskjálftar voru staðsettir í Heklu.
Suðurland
Um tugur jarðskjálfta voru staðsettir suðurlandsbrotabeltinu í vikunni, dreifðir um svæðið og allir um og undir einu stigi. Á Hengilsvæðinu voru rúmlega 45 jarðskjálftar mældir, þar af um 30 voru staðsettir í þyrpingu á Mosfellsheiði rétt norðan við Nesjavallaveg, allir skjálftarnir voru undir tveimur stigum. Önnur skjálftavirkni á svæðinu dreifðist í kringum Hengilinn og Hellisheiði.
Fjórir grunnir smáskjálftar voru staðsettir í og við Heklu í vikunni.
Reykjanesskagi
Rúmlega 20 jarðskjálftar voru staðsettir í Reykjanesskaga í vikunni, flestir dreifðust í kringum Kleifarvatn og í fjöllunum þar suðvestur af. Tveir skjálftar voru staðsettir suður af Fagradalsfjalli.
Tæpur tugur skjálfta mældust á Reykjaneshrygg, flestir um 40 km suðvestur af Reykjanestá. Stærsti skjálftinn var 2.7 að stærð en aðrir skjálftar voru um og undir tveimur stigum.
Norðurland
Úti fyrir Norðurlandi voru staðsettir rúmlega 75 jarðskjálftar, þar af voru um 35 skjálfar mældir í skammvinnri hrinu í Öxarfirði. Stærsti skjálftinn var 2,4 að stærð, 14. ágúst kl 20:44. Um 2 km austur af Flatey á Skjálfanda voru staðsettir 13 jarðskjálftar, allir um og undir 1,5 stigum. Aðrir 13 skjálftar voru staðsettir úti fyrir Eyjafirði, flestir um 16 km norðvestur af Gjögurtá. Stærstur skjálftanna var 2,7 stig að stærð, en aðrir voru allir undir tveimur stigum. Tveir skjálftar voru staðsettir lengra úti á Eyjafjarðardjúpi, báðir tæplega tvö stig. Norðaustur af Grímsey voru um 10 skjálftar staðsettir, stærstur þeirra var 3,0 að stærð, þann 13. ágúst kl 19:36. Engar tilkynningar bárust um að skjálftinn hafi fundist.
Á Kröflusvæðinu voru staðsettir átta jarðskjálftar, allir um og undir einu stigi.
Hálendið
Tæplega 100 skjálftar voru staðsettir í Vatnajökli í vikunni, þar af um það bil 20 skjálftar í Öræfajökli, allri um og undir einu stigi. 6 skjálftar voru staðsettir norður af Esjufjöllum, allir undir tveimur stigum og tæpur tugur skjálfa voru staðsettir í kringum Grímsvötn. Á annan tug skjálfta mældust á Lokahrygg og á svæðinu þar í kring. Tveir stærstu skjálftanna voru af stærð 2,8 og voru á um það bil 10 km dýpi, um 6 km norðaustur af Hamrinum. Um tugur skjálfa mældust í Bárðarbungu, allri undir tveimur stigum og átta jarðskjálftar mældust á djúpa svæðinu þar sem að berggangurinn undir Dyngjujökuli beygir. Örfáir smáskjálftar voru staðsettir í bergganginum undir Dyngjujökuli og sömuleiðis í Kverkfjöllum.
Í Öskju mældust 15 jarðskjálftar, flestir í austurbrún öskjunnar, stærsti skjálftinn var 1,5 að stærð í vesturhluta öskjunnar. Um tugur smáskjálfta voru staðsettir í kringum Herðubreið og Herðubreiðartögl. Einn skjálfti var staðsettur vestur af Trölladyngju og einn í Geitlandsjökli í sunnanverðum Langjökli.
Mýrdalsjökull
Í Mýrdalsjökli voru staðsettir fimm jarðskjálftar. Stærsti skjálftinn var 2,0 að stærð, norðarlega í Kötluöskjunni. Skjálftarnir dreifðust um öskjuna og Goðabungu-svæðið. Rúmlega 20 jarðskjálftar mældust á Torfajökulssvæðinu í vikunni, flestir voru staðsettir í tveimur þyrpingum, annarsvegar við vesturbrún öskjunnar og hinsvegar milli Torfajökuls og Kaldaklofsjökuls. Allir skjálftarnir voru um og undir tveimur stigum.
