Hugleiðingar veðurfræðings
Nú er öflug fyrirstöðuhæð suður í hafi, en í dag mun lægð fara yfir Grænland frá vestri til austurs.
Það er því vaxandi vindur hjá okkur í dag og undir kvöld verður víða suðvestan hvassviðri eða stormur. Hæðin beinir til okkar mjög hlýjum og rökum loftmassa. Það má því búast við þungbúnu veðri og súld eða rigningu. Á austanverðu landinu verður hærra undir skýin og þurrt að mestu, þar gæti hitinn farið yfir 20 stig í hnjúkaþey. Í nótt gera spár ráð fyrir að áðurnefnd lægð verði stödd fyrir norðan land og búin að dýpka mjög. Þá má búast við vestan stormi víða á landinu.
Á morgun fikrar lægðin sig síðan lengra til austurs og dregur þá kalt heimskautaloft yfir landið og það snögg kólnar. Á Norður- og Austurlandi má búast við rigningu nærri sjávarmáli, en slyddu eða snjókomu á heiðum og til fjalla. Sunnan og vestanlands verður hins vegar þurrt og bjart veður. Á austurhelmingi landsins má búast við mikilli veðurhæð á morgun, útlit er fyrir norðvestan storm eða rok með hættulegum vindhviðum og engu ferðaveðri.
Veður í september hefur fram að þessu hefur verið rólegt og því verður veðrið um helgina mikil viðbrigði og mikilvægt að láta það ekki koma sér á óvart. Íbúar á landinu eru hvattir til huga að sínu nærumhverfi og gera ráðstafanir. Til dæmis þarf að koma sumarhúsgögnum í skjól sem og öðrum hlutum sem geta fokið.
Það má því búast við miklum sviptingum í veðrinu um helgina, útlit er fyrir óveður í tveimur þáttum. Í dag eru það hlýindi og suðvestan hvassviðri eða stormur. Á morgun enn sterkari norðvestanátt og kólnar, þó ber að árétta að vestanvert landið virðist ætla að sleppa við óveður á morgun.
Veðuryfirlit
1400 km SSV af Reykjanesi er nærri kyrrstæð 1035 mb hæð. Skammt V af Hvarfi er vaxandi 989 mb lægð sem fer NA og yfir vestur Grænlandi er 987 mb lægð sem fer A og dýpkar.
Veðurhorfur á landinu
Suðvestan 10-18 m/s um hádegi og 15-23 undir kvöld, hvassast norðvestanlands. Súld eða rigning, en yfirleitt þurrt á austanverðu landinu. Hiti 10 til 20 stig, hlýjast á Austfjörðum. Víða vestan stormur á landinu í nótt. Snýst í norðvestan 20-28 m/s á morgun, en mun hægari vindur á vestanverðu landinu. Hættulegar vindhviður á Suðausturlandi og Austfjörðum. Rigning nærri sjávarmáli á Norður- og Austurlandi, en slydda eða snjókoma á heiðum og til fjalla. Bjartviðri sunnan- og vestanlands. Hiti í byggð frá 2 stigum í innsveitum á Norðausturlandi, upp í 10 stig syðst á landinu.
Veðurhorfur á höfuðborgarsvæðinu
Suðvestan 8-13 m/s, en 15-20 í kvöld. Súld eða rigning, hiti 10 til 12 stig.
Vestan 18-23 í nótt og þurrt að kalla. Minnkandi norðvestanátt á morgun, 3-8 undir kvöld og léttir til. Hiti 5 til 8 stig yfir daginn.
Veðurhorfur á landinu næstu daga
Á mánudag:
Breytileg átt 3-8 m/s á vesturhelmingi landsins, en norðvestan 13-20 austanlands fram eftir degi. Víða þurrt og bjart veður og hiti 2 til 8 stig, mildast vestast.
Á þriðjudag:
Norðlæg eða breytileg átt 3-10. Skýjað og lítilsháttar væta um landið vestanvert og norðaustantil, annars þurrt að kalla. Hiti 2 til 9 stig, hlýjast suðaustanlands.
Á miðvikudag:
Hæg suðaustlæg eða breytileg átt. Lítilsháttar væta sunnan- og austanlands, en þurrt annars staðar. Hiti 5 til 10 stig að deginum.
Á fimmtudag:
Suðaustanátt og rigning suðaustanlands, annars hægari og úrkomulítið. Hiti breytist lítið.
Á föstudag:
Ákveðin austanátt og þurrt að kalla, en dálítil væta suðaustan- og austanlands. Áfram fremur milt.
