Forseti Íslands þarf að geta tekið óþægilegar ákvarðanir, í stað þess að sitja á friðarstól, á örlagatímum. Þetta segir Ólafur Ragnar Grímsson, fyrrverandi forseti Íslands, um embættið. Ólafur var gestur Sigríðar Hagalín Björnsdóttur í Silfrinu í gærkvöld og fjallað var um málið á vef rúv.is. Hann gaf til kynna að nauðsynlegt væri að forsetinn væri öryggisventill þjóðarinnar.
,,Ólafur áréttaði að forsetinn gengdi lykilhlutverki í íslenskri stjórnskipan. Margir þekktu hvernig málskotsréttinum hefur verið beitt. Forseti þurfi að vera tilbúinn að veita þjóðinni þann rétt þrátt fyrir harða andstöðu stjórnmálamanna og jafnvel helsta stuðningsfólks.
Þjóðin þurfi að hafa í huga að á örlagatímum geti forseti þurft að taka óþægilegar ákvarðanir til að tryggja lýðræðislegan rétt þjóðarinnar til samstarfs við aðrar þjóðir. Hann sitji því ekki endilega á friðarstóli. Ólafur segir orðið sameiningartákn ekki það rétta til að lýsa forseta Íslands.
Það sé að öðrum þræði búið til af ráðandi stjórnmálastétt í landinu til að halda forsetanum í skefjum. „Og ef þú leggur höfuðáherslu á það að forsetinn sé sameiningartákn þá ertu í raun og veru að segja að hann megi aldrei gera neitt, sem brýtur í bága við vilja ráðherra, Alþingis eða ríkisstjórnarinnar.“
Fólk þurfi að hafa það í huga þegar það gengur að kjörborðinu að forsetinn sé höfuð ríkisins og beri endanlega ábyrgð á því að lýðveldið hafi ríkisstjórn. „Sagan sýnir okkur það hins vegar að það koma þær stundir að enginn sé eftir til að leysa ágreininginn, eða leysa flækjurnar, nema forsetinn,“ sagði Ólafur Ragnar Grímssson í Silfrinu.“