Skipuleggjendur tónleika Guns N’ Roses þakka fyrir sig
Stærstu tónleikar Íslandssögunnar áttu sér stað þriðjudagskvöldið 24. júlí þegar bandaríska rokksveitin Guns N’ Roses lék á Laugardalsvelli fyrir framan rúmlega 25 þúsund tónleikagesti.
Vel hefur verið látið af tónleikunum sem er einstaklega ánægjulegt fyrir skipuleggjendur að heyra. Frammistaða hljómsveitarinnar var frábær og stóð hún algerlega undir væntingum og vel það. Guns N’ Roses er hljómsveit sem er komin í flokk stærstu rokksveita tónlistarsögunnar.
Meðlimir sveitarinnar eru lifandi goðsagnir og margir tónleikagestir voru að fá langþráðan draum uppfylltan að sjá sveitina leika frægustu lög sín á sviði – og það á Íslandi. Það er mikill heiður fyrir skipuleggjendur tónleikanna að fá að eiga hlut að máli við að uppfylla slíka drauma.
Skipuleggjendur á vegum show.is, framleitt af Solstice Productions, vilja skila einlægum og innilegum þakkarkveðjum til allra sem áttu þátt í að gera tónleika Guns N’ Roses á Laugardalsvelli að ógleymanlegum viðburði. Knattspyrnusamband Íslands, Reykjavíkurborg, Hljóð X, veitingasalar á svæðinu, Strætó, Lögreglan, gæslufólk – þetta hefði ekki verið hægt án ykkar.
Það þarf margt til, til að slíkur risaviðburður gangi upp eins vel og hann gerði. Það þarf listamenn, það þarf samstarfsaðila, það þarf mikla vinnu, skipulagningu og skapandi hugsun. Það þarf svita og tár. En þegar allt kemur til alls eru tónleikar náið samband milli listamanna sem spila, og tónleikagestanna sem njóta.
Stærstu þakkirnar fara því til ykkar, áhorfenda og tónlistaraðdáenda á Íslandi sem nutu kvöldsins í Laugardalnum. Þið sýnduð okkur að þetta er hægt, við getum haldið risatónleika á Íslandi. Það, eitt og sér, eru frábærar fréttir.
Kærar þakkir fyrir okkur.
