Hugleiðingar veðurfræðings
Lægð djúpt suður af landi veldur sunnanátt og rigningu á landinu í kvöld og á morgun, og sums staðar sunnanlands gæti rignt mikið. Líkön benda sérstaklega til þess að mikil rigning verði undir Eyjafjöllum og Mýrdalsjökli. Þannig má gera ráð fyrir að ár á leiðinni í Þórsmörk og aðrar óbrúaðar ár sem fara þarf yfir t.d. að Fjallabaki verði hættulegri yfirferðar en ella.
Þá er útlit fyrir slagviðri á vinsælum gönguleiðum á sunnanverðu hálendinu og að Fjallabaki og ættu göngu og hjólreiðafólk að skoða spárnar vel áður en lagt er af staða á morgun.
Hiti er almennt 10 til 18 stig, hlýjast suðaustanlands og á Norðurlandi.
Það styttir upp og léttir að mestu til á fimmtudag en á föstudag er næsta lægði í kortunum og gæti hún valdið nokkrum leiðindum, bæði allhvössum vindi og rigningu um allt land á föstudag og laugardag.
Gul viðvörun vegna veðurs: Suðurland og Suðausturland
Veðurhorfur á landinu
Hæg breytileg átt, skýjað með köflum og dálítil súld á vestanverðu landinu en líkur á skúrum norðan og austanlands. Gengur í suðaustanátt, 5-13 m/s síðdegis en 8-15 í kvöld og fer að rigna. Talsverð eða mikil rigning við suðurströndina, en úrkomuminna norðaustantil.
Áframhaldandi sunnanátt, 8-13 m/s og rigning á morgun en styttir upp á Vestfjörðum eftir hádegi og víðar á vestanverðu landinu annað kvöld. Hiti yfirleitt á bilinu 10 til 18 stig.
Veðurhorfur á landinu næstu daga
Á fimmtudag:
Suðvestan og vestan 5-13 m/s en heldur hvassari norðvestantil. Skýjað og dálítil súld vestanlands og hiti 8 til 13 stig, en bjart með köflum austantil og hiti að 18 stigum.
Á föstudag:
Norðlæg átt, 5-10 m/s en suðlægari austanlands framan af degi. Rigning um allt land en styttir upp sunnantil eftir hádegi. Hiti 8 til 16 stig en svalara fyrir norðan.
Á laugardag:
Allhvöss norðvestan- og vestanátt með rigningu á norðvestanverðu landinu, en annars stöku skúrir. Hiti yfirleitt 5 til 12 stig, svalast fyrir norðan.
Á sunnudag:
Fremur hæg suðvestlæg átt og skúrir, en úrkomuminna austanlands. Hiti 8 til 14 stig.
Á mánudag (frídagur verslunarmanna):
Fremur hæg breytileg átt, skýjað með köflum en stöku skúrir, einkum síðdegis. Hiti breytist lítið.
FLEIRI FRÉTTIR OG SPJALLIÐ ER OPIÐ HÉR
