Undirbúningur jólabæjarins hafinn og skautasvell sett upp í miðbænum
Hafnarfjarðarbær fagnar vetri með undirbúningi jóla. Það stefnir allt í að aðventan verði ekki bara björt og fögur heldur einnig afar lífleg og fjörug og líklega laus við takmarkanir.
Jólabærinn Hafnarfjörður stimplaði sig rækilega inn í hug og hjörtu Hafnfirðinga og vina Hafnarfjarðar um land allt um síðustu jól með samhentu og góðu átaki allra; íbúa, fyrirtækja og stofnana í öllum hverfum bæjarins.
Þúsundir sóttu bæinn heim á aðventunni og upplifðu jólabæinn sem sjaldan hefur verið jólalegri, nutu góðra veitinga og notuðu tækifærið til að versla gjafir og alls konar góðgæti.
Jólaþorp, ævintýraland og skautasvell
Jólin eru jafnt og þétt að færast yfir Hafnarfjörð og í síðustu viku hófst starfsfólk bæjarins handa við uppsetningu á jólaskreytingum í miðbæ Hafnarfjarðar og munu ný ljós og skreytingar bætast jafn og þétt við næstu daga og vikur. Jólaþorpið á Thorsplani með öll sín fagurlega skreyttu jólahús og jólagleði opnar föstudaginn 26. nóvember og er jólaævintýrið í Hellisgerði einnig í fullum undirbúningi.
Á fundi menningar- og ferðamálanefndar Hafnarfjarðar í vikunni var lögð til fjárfesting í skautasvelli sem opnað verði um leið og Jólaþorpið í lok nóvember 2021. Fyrstu hugmyndir gera ráð fyrir að svellið verði sett upp á Ráðhústorgi, miðja vegu milli Jólaþorpsins og Hellisgerðis eða beint á móti Bæjarbíói. Um er að ræða hagkvæmt gervisvell með 12-20 ára endingu. Svell sem lítur út eins og ís, virkar eins og ís en er ekki ís og þar af leiðandi er ekkert vatn né orka notuð til þess að kæla svellið. Hugmyndir um slíkt skautasvell í Hafnarfirði hafa verið í umræðunni um árabil og er vilji fyrir því að láta þessa skemmtilegu hugmynd verða að veruleika í ár. Er framkvæmdin til þess fallin að ýta enn betur undir upplifun og afþreyingu í jólabænum Hafnarfirði á aðventunni.
Hvatning til íbúa og fyrirtækja í bænum
Daginn er tekið að stytta og tími jólaljósanna runninn upp. Hafnarfjarðarbær hvetur Hafnfirðinga til að setja jólaljósin snemma upp í ár. Starfsfólk bæjarins er að vinna sig jafnt og þétt í gegnum bæinn og setja upp jólaljós á fjölförnum stöðum og opnum svæðum. Allt er þetta gert með það fyrir augum að gleðja augað og andann og ýta undir jákvæða upplifun og ánægju þeirra sem leið eiga um bæinn hvort sem er gangandi, hlaupandi, hjólandi eða akandi.