,,Eins og að gera Alþingi íslendinga að ómerkilegum stimpilpúða fyrir fjármálaráðherra, veislustjóra Vogunarsjóðanna“
Þingmenn Miðflokksins ræddu gjaldeyrismál í um fimmtán klukkutíma á Alþingi og lauk umræðunni klukkan 5:20 í morgun eftir meira en 320 ræður og næsti þingfundur verður, samkvæmt dagskrá Alþingis, klukkan 15:00 í dag. Fjármálaráðherrann Bjarni Benediktsson var fjarverandi og töluðu allir þingmenn Miðflokksins fyrir tómu húsi, ef frá er talið að einn sjálfstæðisþingmaður var viðstaddur í þingsal brot af tímanum og annar frá VG var í þingsal. Allir níu þingmenn Miðflokksins röðuðu sér á mælendaskránna.
Sigmundur Davíð Gunnlaugsson sagði að eigendur þeirra aflandskróna sem að um sé rætt nú (83 milljarðar) séu nú í eigu u.þ.b. tíu 
Vogunarsjóða en að þeir hefðu ekki verið upprunarlegir eigendur fjárins og hefðu keypt kröfurnar með miklum afslætti. Þeir hafi keypt 300 íslenskar krónur á eina evru og svo fór Sigmundur Davíð nánar yfir söguna að hluta og óskaði eftir að koma aftur í pontu til þess að halda áfram með málið.
Þorsteinn Sæmundsson sagði að það væri eins og verið væri að gera Alþingi íslendinga að ómerkilegum stimpilpúða fyrir fjármálaráðherra, veislustjóra Vogunarsjóðanna.
Þá sagði Karl Gauti Hjaltason að það væri furðulegt að á sama tíma og að ekkert væri hægt að gera fyrir öryrkja, aldraða og þá sem að minna mega sín í þjóðfélaginu, væri hægt að rétta Vogunarsjóðum 83 milljarða á einu bretti.
Um klukkan 19 mínútur yfir fimm bauð forseti Alþingis, þingmönnum Miðflokksins, að halda annarri umræðu um meðferð krónueigna sem háðar eru sérstökum takmörkunum og gjaldeyrismál þar til þing hefst að nýju í dag.
Þorsteinn Sæmundsson, þingmaður Miðflokksins, sagðist vilja halda áfram umræðum í dag ef fjármálaráðherra sæi sér fært að vera viðstaddur umræðurnar. Steingrímur J. Sigfússon, þingforseti, sagði það þegar hafa verið ákveðið að leita til starfandi fjármálaráðherra í fjarveru Bjarna Benediktssonar, til að athuga hvort hann geti verið viðstaddur umræðurnar í dag.