,,Það þarf að inkalla allan kvóta og láta ríkið úthluta þjóðareigninni gegn réttu veiðigjaldi til þjóðarinnar“
16.000 króna veiðigjald sem stórútgerðin er að borga í dag, dugir ekki einu sinni til að borga kostnaðinn við Hafrannsóknarstofnun, hvað þá alla aðra þjónustu sem útgerðin fær hjá ríkinu. Þjóðin er að borga með sjávarútvegnum og er að tapa á honum en þjóðin á rétt á miklu hærra gjaldi og meiri arði af eign sinni. Bæði sjávarauðlindinni og raforkunni og öðrum auðlindum sínum. ,,Útgerðarmenn afgreiða sín veiðigjöld og kjör gagnvart ríkinu á lokuðum einkafundum og þeim er andskotans sama um þjóðina“
Það þyrfti enginn að líða skort á Íslandi ef tekið væri eðlilegt gjald af auðlindum, til dæmis sjávarauðlindum sem hlægilegt gjald sé tekið fyrir í dag og það er kominn tími til aðgerða til að breyta því. Heilbrigðiskerfið þyrfti ekki að vera svelt eða skólakerfið né samfélagið í heild, aldraðir og öryrkjar, eins og staðan er í dag. Þetta var meðal þess sem fram kom í máli Magnúsar Guðbergssonar sjómanns í síðdegisútvarpinu þar sem hann var gestur Kolfinnu Baldvinsdóttur á útvarpi Sögu.
Magnús sem hefur fengið sig fullsaddan af kvótakerfinu og því óréttlæti sem því fylgir stendur nú að stofnun félags sem ber heitið Réttlæti og ætlað er að vinna að þrýsta á um breytingar. Meðal þess sem til skoðunar sé er að menn fari að róa án kvóta með það að markmiði að koma hreyfingu á þessi mál. Söfnun gengur vel og Magnús segir að þjóðin standi með þeim aðilum sem ætla út í aðgerðir gegn kvótakerfinu og fara með málið fyrir Mannréttindadómstól Evrópu.
Hann segir þó ekki mjög hlaupið að því þar sem það get verið dýrt að reka mál fyrir dómstólum. Því séu menn byrjaðir að safna í sjóð til þess að geta fjármagnað aðgerðir.
Magnús segir að til þess að gerðar verði breytingar þurfi þjóðin að standa í fæturnar og berjast gegn þessu óréttlæti, það geti smábátasjómenn ekki gert án stuðnings. Í þættinum ræddi Magnús um þær afleiðingar sem kvótakerfið hefur haft á samfélagið allt og hvaða hugmyndir smábátasjómenn hafa fram að færa til þess að koma breytingum á.
Hlusta má á viðtalið í spilaranum hér að neðan.
