Hér munu þúsundir milljóna hverfa í hítina ef ekki verður gripið inn í.
Stundum er manni öllum lokið.
Nær væri að huga að eðlilegu viðhaldi og þá sérstaklega í úthverfum borgarinnar.
Hér er bókun mín vegna málsins:
Bókun fulltrúa Miðflokksins vegna liðs nr.1 – Tillaga um Grófarhús
Hér er lögð fram tillaga um stórfelldar framkvæmdir án þess að fyrir liggi nokkurt kostnaðar- eða árangursmat.
Ljóst er þó að um er að ræða milljarða.
Ljóst er þó að árangur verður mögulega enginn.
Slík vinnubrögð eru ekki boðleg í ljósi áfellisdóma þar sem sambærilegum vinnubrögðum var beitt í td. Bragga-verkefni, Hlemm-verkefni og fjölda annarra verkefna sem ráðist hefur verið í af fullkomnu ábyrgðarleysi af hálfu meirihlutans.
Í kynningarferð ráðsins til Árhúsa og Osló í október síðastliðnum kom afar skýrt fram að aðsókn og útlán bóka hefur áfram dvínað, þrátt fyrir að ofurfjárhæðum hafi verið veitt í málaflokkinn.
Við skoðun á því safni sem helst er horft til, Dokken1 í Árhúsum, er síðan beinlínis beitt blekkingum til að ná fram uppdiktuðum tölum um hið gagnstæða.
Þarna hefur verið fjárfest fyrir milljarða eða milljarðatugi í nafni eflingar bókasafns með fögrum fyrirheitum um aukningu notenda.
Niðurstaðan er hins vegar skýr: Aðsókn á bókasafnið/útlánum fækkar ár frá ári.
Rafbækur, stórbætt aðgengi að rafrænum upplýsingum og gríðarleg aukning afþreyingar almennt, spila stórt hlutverk í þessari þróun.
Hér ættum við að fagna stórminnkuðu kolefnisspori, en ekki berjast gegn því með tilgangslausum fjáraustri.
Baldur Borgþórsson Varaborgarfulltrúi Miðflokksins