Hugleiðingar veðurfræðings
Lægðin austur af landinu fjarlægist okkur nú smám saman og dregur úr vindi og úrkomu á austanverðu landinu og eru gular viðvaranir að renna út núna í morgunsárið. Austanlands hefur mælst norðvestan hvassviðri eða stormur, en mesti vindhraði mældist 30 m/s í Papey í gær og hviður hafa farið yfir 40 m/s.
Á eftir lægðinni kemur skammlífur hæðarhryggur inn á landið seinna í dag með björtu og hægu veðri víða og allt upp í 20 stiga hita sunnanlands. Hryggurinn ætlar þó að staldra stutt við því næsta lægð nær landi á morgun úr vestri og byrjar að rigna sunnan- og vestanlands, en víða bjart veður norðaustantil og hiti upp í 22 stig þar. Eftir svalan norðvestanvindinn með rigningu og jafnvel slyddu síðasta sólarhringinn verður því mikill viðsnúningur fyrir íbúa og gesti Norðausturlands um helgina. Spá gerð: 29.06.2024 06:56. Gildir til: 30.06.2024 00:00.
Veðurhorfur á landinu
Minnkandi norðvestanátt austanlands og dálítil væta, 3-10 m/s seinnipartinn og rofar til. Breytileg átt 3-8 og lengst af bjart sunnan- og vestantil. Hiti 10 til 20 stig að deginum, hlýjast syðst.
Suðlæg átt á morgun, víða 8-15 m/s og dálítil súld, en hægari og bjartviðri norðaustanlands. Fer að rigna sunnan- og vestanlands síðdegis. Hiti 10 til 22 stig, hlýjast um landið norðaustanvert.
Spá gerð: 29.06.2024 09:59. Gildir til: 01.07.2024 00:00.
Veðurhorfur á landinu næstu daga
Á mánudag:
Suðvestan 5-13 m/s og rigning eða súld með köflum. Léttir til þegar líður á daginn, fyrst sunnan- og vestanlands. Hiti 9 til 18 stig, hlýjast fyrir austan.
Á þriðjudag:
Suðaustlæg eða breytileg átt, 3-8. Bjart með köflum og stöku skúrir, en skýjað vestantil og súld eða rigning þar um kvöldið. Hiti 8 til 16 stig, hlýjast norðaustanlands.
Á miðvikudag:
Norðaustan 5-13 og rigning með köflum, en þurrt norðaustanlands. Hiti 6 til 14 stig, svalast norðvestantil.
Á fimmtudag og föstudag:
Útlit fyrir norðlæga átt og vætu í flestum landshlutum, en síðdegisskúrir suðvestantil. Hiti 7 til 15 stig, hlýjast suðvestanlands.
Spá gerð: 29.06.2024 08:22. Gildir til: 06.07.2024 12:00.
