Uppfært:
Guðlaugur Þór Þórðarson, umhverfis-, orku- og loftslagsráðherra og þingmaður Sjálfstæðisflokksins býður sig fram til formanns Sjálfstæðisflokksins. Þetta tilkynnti hann á fundi í Valhöll, höfuðstöðvum Sjálfstæðisflokksins. Mikil fagnaðarlæti brutust út þegar Guðlaugur Þór steig í pontu en salurinn var þéttsetinn.
Á fundinum lagði hann áherslu á að flokkurinn yrði að snúa vörn í sókn. „Sjálfstæðisflokkurinn á ekki að vera stærsti flokkurinn, hann á alltaf að vera langstærsti flokkurinn.“
Guðlaugur Þór Þórðarson, umhverfis-, orku- og loftslagsráðherra, boðar til opins fundar í dag klukkar 12:30 í Valhöll þar sem hann mun gera grein fyrir ákvörðun sinni um það hvort hann ætli að bjóða sig fram til formanns. Þetta kemur fram í Fréttablaðinu í dag.
Þar segir að mikið hafi verið fjallað um Guðlaug undanfarna daga en hann sagði frá því í síðustu viku að hann væri að skoða það að bjóða sig fram til formanns Sjálfstæðisflokksins á landsfundi flokksins næstu helgi. Aðeins einn er þegar í framboði og það er núverandi formaður flokksins, Bjarni Benediktsson, sem hefur verið formaður síðan árið 2009.
Í viðtali við Fréttablaðið í vikunni sagði Guðlaugur Þór þetta stóra ákvörðun og að hann myndi ávallt tilkynnta formanninum hana fyrst. Hann sagði fjölda hafa skorað á sig og að hann tæki þessa ákvörðun alvarlega.
