Jón Gunnarsson þingmaður Sjálfstæðisflokksins hótar stjórnarslitum vegna samstarfsörðugleika við Vinstri græna þegar að kemur að virkjanamálum. Þetta kemur fram í Morgunblaðinu í dag.
Þar segir m.a. „Ég get ekki séð að við þingmenn Sjálfstæðisflokksins getum stutt stjórnarsamstarf sem fer fram með þessum hætti. Það er best að gera grein fyrir því strax,“ segir Jón Gunnarsson, þingmaður Sjálfstæðisflokksins og fv. ráðherra, í aðsendri grein í Morgunblaðinu í dag.
Tilefni þessara ummæla er verklag umhverfisráðherra þegar kemur að friðlýsingum. „Aðferðafræði hans stenst að mínu mati enga skoðun og hafa margir hagsmunaaðilar fullyrt að ekki sé farið að lögum í þeirri útfærslu sem hann boðar.
Ég er sammála því að verklag hans samræmist ekki lögum. Skýrt dæmi um hvernig aðferðafræði ráðherrans mun virka í raun er t.d. að ef engin virkjun væri í dag til staðar í Þjórsá og Alþingi hefði ákveðið að setja virkjunarkostinn Urriðafoss í verndarflokk myndi ráðherrann friða allt vatnasvæði Þjórsár frá jökli til ósa þannig að engin virkjun yrði reist við Þjórsá.
Þetta er galin leið og gengur ekki upp,“ segir Jón Gunnarsson þingmaður meðal annars í grein sinni en hana er hægt að lesa í heild í Morgunblaðinu í dag.
Þingmaður Sjálfstæðisflokksins hótar stjórnarslitum
Umræða
