Matvælastofnun hefur veitt Löxum eignarhaldsfélagi ehf. rekstrarleyfi til fiskeldis í Reyðarfirði í samræmi við lög um fiskeldi. Matvælastofnun auglýsti tillögu að rekstrarleyfi á vef stofnunarinnar þann 2. júlí 2020 og var frestur til að skila inn athugasemdum til 4. ágúst 2020.
Laxar eignarhaldsfélag sótti um nýtt rekstrarleyfi fyrir 10.000 tonnum af laxi í Reyðarfirði. Fyrirtækið er fyrir með annars vegar 6.000 tonna rekstrarleyfi og hins vegar 3.000 tonna rekstrarleyfi fyrir sjókvíeldi á laxi í Reyðarfirði. Umsókn um rekstrarleyfi var móttekin 3. október 2017 og mun 3.000 tonna leyfið falla inn í þau 10.000 tonn sem hér eru til umfjöllunar. Fyrirtækið hyggst því ala 16.000 tonn af laxi á tveimur aðskildum rekstrarleyfum.
Hámarkslífmassi eldisins vegna rekstrarleyfis FE-1152 í Reyðarfirði mun ekki fara yfir 10.000 tonn sem er í samræmi við burðarþolsmat Reyðarfjarðar. Tekið var tillit til áhættumats Hafrannsóknastofnunar við útgáfu rekstrarleyfisins. Starfsemin er einnig háð starfsleyfi Umhverfisstofnunar. Framkvæmd fyrirtækisins fór í gegnum mat á umhverfisáhrifum í samræmi við lög um mat á umhverfisáhrifum. Heimilt er að kæra ákvörðun Matvælastofnunar um útgáfu rekstrarleyfisins til úrskurðarnefndar umhverfis- og auðlindamála og er kærufrestur einn mánuður frá birtingu þessarar auglýsingar.
Þá hefur Matvælastofnun hefur endurnýjað rekstrarleyfi Landeldis ehf. að Öxnalæk í Ölfusi í samræmi við lög um fiskeldi. Matvælastofnun auglýsti tillögu að rekstrarleyfi á vef stofnunarinnar þann 19. ágúst 2020 og var frestur til að skila inn athugasemdum til 16. september 2020.
Landeldi ehf. sótti um endurnýjun á rekstrarleyfi vegna seiðaeldis á 100 tonnum af laxi en fyrirtækið hefur nýtekið yfir eldisstöðina sem hefur verið starfrækt þar um árabil. Umsókn um endurnýjun rekstrarleyfis var móttekin þann 23. mars 2020. Starfsemin er einnig háð starfsleyfi Umhverfisstofnunar. Heimilt er að kæra ákvörðun Matvælastofnunar um útgáfu rekstrarleyfisins til úrskurðarnefndar umhverfis- og auðlindamála og er kærufrestur einn mánuður frá birtingu þessarar auglýsingar.
- Rekstrarleyfi Matvælastofnunar til Landeldis ehf. vegna seiðaeldis að Öxnalæk
- Greinargerð Matvælastofnunar
- Rekstrarleyfi Matvælastofnunar til Laxa eignarhaldsfélags ehf. vegna sjókvíaeldis í Reyðarfirði
- Álit Skipulagsstofnunar um mat á umhverfisáhrifum
- Matsskýrsla Laxa eignarhaldsfélags ehf.
- Afstaða Matvælastofnunar til álits Skipulagsstofnunar
