Stöðva verður þróun ofurlauna sem er hafin á ný
,,Umræður á öðrum fundi samtaka sparifjáreigenda um hrunið, sem haldinn var í Öskju í hádeginu, benda til þess að spjótin muni í vaxandi mæli beinast að lífeyrissjóðunum á þann veg, að fulltrúar þeirra í stjórnum skráðra fyrirtækja verði að stöðva þá þróun ofurlauna sem hafin er á ný.“ Segir Styrmir Gunnarsson, f.v. ritstjóri Morgunblaðsins.
Ein af ástæðunum er augljóslega sú, að þessi launaþróun mun, ásamt launaákvörðunum Kjararáðs síðustu misseri, leiða til kröfugerðar af hálfu verkalýðsfélaganna, sem flest fyrirtæki í landinu geta ekki staðið undir.
Athygli vakti að Vilhjálmur Birgisson, verkalýðsleiðtogi á Akranesi var á fundinum og vakti athygli á launakjörum forstjóra Eimskips og að lífeyrissjóðir ættu 52% hluti í Eimskip samanlagt. Þá vakti athygli athugasemd, sem Örn Pálsson bar fram á fundinum en hann kvaðst hafa lagt til á aðalfundi síns lífeyrissjóðs, að sjóðurinn beitti sér fyrir lækkun launa forstjóra tiltekinna fyrirtækja og að sú tillaga hefði fengið 7 atkvæði.
Benedikt Jóhannesson, fyrrum fjármálaráðherra var annar frummælenda. Hann sagði meðallaun í landinu vera 650 þúsund krónur á mánuði og kvaðst hafa haft tæpar tvær milljónir í laun á mánuði, sem fjármálaráðherra og komist vel af á þeim launum. Það eru um þreföld meðallaun en enginn var þó tilbúinn til að segja að laun, sem væru hærri en það teldust til ofurlauna.
Hinn frummælandinn, Katrín Ólafsdóttir, hagfræðingur, varpaði fram þeirri spurningu, hvers vegna bankamenn og forstjórar þyrftu meiri hvatningu í launum en aðrir.
